mahfil se uThane ke saza-war hamin the

mahfil se uThāne ke sazā-vār hamīñ the

sab phuul tire baaġh the ik ḳhaar hamīñ the

ham kis ko dikhāte shab-e-furqat kī udāsī

sab ḳhvāb meñ the raat ko bedār hamīñ the

saudā tirī zulfoñ kā gayā saath hamāre

mar kar bhī na chhūTe vo giraftār hamīñ the

kal raat ko dekhā thā jise ḳhvāb meñ tum ne

ruḳhsār pe rakkhe hue ruḳhsār hamīñ the

dil-soḳhta the chāhne vāloñ meñ tumhāre

lekin sabab-e-garmī-e-bāzār hamīñ the

kal kūcha-e-qātil meñ jo thā ḳhalq kā majma.a

khaa.e hue us haath kī talvār hamīñ the

ai ishq-e-mizha kaun hameñ dekhne aatā

āñkhoñ meñ khaTakte the vo bīmār hamīñ the

turbat meñ bhī āñkheñ na huiiñ band hamārī

aise tire ik tālib-e-dīdār hamīñ the

ThanDe kiye ġhairoñ ke dil aur ham ko jalāyā

ik the to mohabbat ke gunahgār hamīñ the

milte hī lab-e-yār se lab dil nikal aayā

maarā jise iisā ne vo bīmār hamīñ the

tum ġhairoñ se Dar Dar ke lipaT jaate the paiham

kal raat ko nālāñ pas-e-dīvār hamīñ the

sab raaz ta.ashshuq'' se bayāñ hote the dil ke

pahle tire ik mahram-e-asrār hamīñ the

mahfil se uThane ke saza-war hamin the

sab phul tere bagh the ek KHar hamin the

hum kis ko dikhate shab-e-furqat ki udasi

sab KHwab mein the raat ko bedar hamin the

sauda teri zulfon ka gaya sath hamare

mar kar bhi na chhuTe wo giraftar hamin the

kal raat ko dekha tha jise KHwab mein tum ne

ruKHsar pe rakkhe hue ruKHsar hamin the

dil-soKHta the chahne walon mein tumhaare

lekin sabab-e-garmi-e-bazar hamin the

kal kucha-e-qatil mein jo tha KHalq ka majma

khae hue us hath ki talwar hamin the

ai ishq-e-mizha kaun hamein dekhne aata

aankhon mein khaTakte the wo bimar hamin the

turbat mein bhi aankhen na huin band hamari

aise tere ek talib-e-didar hamin the

ThanDe kiye ghairon ke dil aur hum ko jalaya

ek the to mohabbat ke gunahgar hamin the

milte hi lab-e-yar se lab dil nikal aaya

mara jise isa ne wo bimar hamin the

tum ghairon se Dar Dar ke lipaT jate the paiham

kal raat ko nalan pas-e-diwar hamin the

sab raaz tashshuq se bayan hote the dil ke

pahle tere ek mahram-e-asrar hamin the