masum KHwahishon ki pashemaniyon mein tha

mā'sūm ḳhvāhishoñ kī pashemāniyoñ meñ thā

jiine kā lutf to inhīñ nādāniyoñ meñ thā

āñkheñ bichhāte har kas-o-nā-kas kī raah meñ

yuuñ jazba-e-ḳhulūs farāvāniyoñ meñ thā

naddī meñ pahroñ jhāñkte rahte the pul se ham

kyā bhed thā jo bahte hue pāniyoñ meñ thā

patthar bane khaḌe the tajassus ke dasht meñ

dil gum tilism-e-shauq kī hairāniyoñ meñ thā

yuuñ reñg reñg kar na guzarte the roz o shab

dariyā-e-zīst bhī kabhī jaulāniyoñ meñ thā

sanjīdgī kī gahrī lakīroñ meñ Dhal gayā

mā'sūmiyat kā nuur jo peshāniyoñ meñ thā

ik ghar banā ke kitne jhameloñ meñ phañs ga.e

kitnā sukūn be-sar-o-sāmāniyoñ meñ thā

din aarzū ke yūñhī udāsī meñ kaT ga.e

vo apne dukh meñ apnī pareshāniyoñ meñ thā

us ke liye bhī zindagī pal pal 'azāb thī

vo bhī sulagte vaqt ke zindāniyoñ meñ thā

vo zabt o e'tidāl o tavāzun kahāñ 'riyāz'

me'yār-e-fan ki jo kabhī yūnāniyoñ meñ thā

ma'sum KHwahishon ki pashemaniyon mein tha

jine ka lutf to inhin nadaniyon mein tha

aankhen bichhate har kas-o-na-kas ki rah mein

yun jazba-e-KHulus farawaniyon mein tha

naddi mein pahron jhankte rahte the pul se hum

kya bhed tha jo bahte hue paniyon mein tha

patthar bane khaDe the tajassus ke dasht mein

dil gum tilism-e-shauq ki hairaniyon mein tha

yun reng reng kar na guzarte the roz o shab

dariya-e-zist bhi kabhi jaulaniyon mein tha

sanjidgi ki gahri lakiron mein Dhal gaya

ma'sumiyat ka nur jo peshaniyon mein tha

ek ghar bana ke kitne jhamelon mein phans gae

kitna sukun be-sar-o-samaniyon mein tha

din aarzu ke yunhi udasi mein kaT gae

wo apne dukh mein apni pareshaniyon mein tha

us ke liye bhi zindagi pal pal 'azab thi

wo bhi sulagte waqt ke zindaniyon mein tha

wo zabt o e'tidal o tawazun kahan 'riyaz'

me'yar-e-fan ki jo kabhi yunaniyon mein tha