kuchh ajab aan se logon mein raha karte the

kuchh ajab aan se logoñ meñ rahā karte the

ham ḳhafā ho ke bhī aapas meñ milā karte the

itnī tahzīb-e-rah-o-rasm to baaqī thī ki vo

laakh ranjish sahī va.ada to vafā karte the

us ne pūchhā thā ka.ī baar magar kyā kahte

ham mizājan hī pareshān rahā karte the

ḳhatm thā ham pe mohabbat kā tamāshā goyā

ruuh aur jism ko har roz judā karte the

ek chup-chāp lagan sī thī tire baare meñ

log aa aa ke sunāte the sunā karte the

terī sūrat se ḳhudā se bhī shanāsā.ī thī

kaise kaise tire milne kī duā karte the

us ko ham-rāh liye aate the merī ḳhātir

mere ġham-ḳhvār mire haq meñ burā karte the

zindagī ham se tire naaz uThā.e na ga.e

saañs lene kī faqat rasm adā karte the

ham baras paḌte the 'shāz' apnī hī tanhā.ī par

abr kī tarah kisī dar se uThā karte the

kuchh ajab aan se logon mein raha karte the

hum KHafa ho ke bhi aapas mein mila karte the

itni tahzib-e-rah-o-rasm to baqi thi ki wo

lakh ranjish sahi wada to wafa karte the

us ne puchha tha kai bar magar kya kahte

hum mizajan hi pareshan raha karte the

KHatm tha hum pe mohabbat ka tamasha goya

ruh aur jism ko har roz juda karte the

ek chup-chap lagan si thi tere bare mein

log aa aa ke sunate the suna karte the

teri surat se KHuda se bhi shanasai thi

kaise kaise tere milne ki dua karte the

us ko ham-rah liye aate the meri KHatir

mere gham-KHwar mere haq mein bura karte the

zindagi hum se tere naz uThae na gae

sans lene ki faqat rasm ada karte the

hum baras paDte the 'shaz' apni hi tanhai par

abr ki tarah kisi dar se uTha karte the