KHun bahane ke hain hazar tariq

ḳhuuñ bahāne ke haiñ hazār tarīq

rañg laane ke haiñ hazār tarīq

ka.aba-o-dair par nahīñ mauqūf

us yagāne ke haiñ hazār tarīq

koī maz.hab nahīñ zamāne kā

is purāne ke haiñ hazār tarīq

uzr-e-mastī o mai-parastī kyā

bhuul jaane ke haiñ hazār tarīq

dil-sitānī ke saikḌoñ andāz

dil satāne ke haiñ hazār tarīq

yaad meñ ḳhvāb meñ tasavvur meñ

aa ki aane ke haiñ hazār tarīq

dil-lagī dil-dahī dil-ārāmī

dil lubhāne ke haiñ hazār tarīq

dil mushabbak huā to farmāyā

aane jaane ke haiñ hazār tarīq

kis tarīqe se ho nibāh 'bayāñ'

ki zamāne ke haiñ hazār tarīq

KHun bahane ke hain hazar tariq

rang lane ke hain hazar tariq

kaba-o-dair par nahin mauquf

us yagane ke hain hazar tariq

koi mazhab nahin zamane ka

is purane ke hain hazar tariq

uzr-e-masti o mai-parasti kya

bhul jaane ke hain hazar tariq

dil-sitani ke saikDon andaz

dil satane ke hain hazar tariq

yaad mein KHwab mein tasawwur mein

aa ki aane ke hain hazar tariq

dil-lagi dil-dahi dil-arami

dil lubhane ke hain hazar tariq

dil mushabbak hua to farmaya

aane jaane ke hain hazar tariq

kis tariqe se ho nibah 'bayan'

ki zamane ke hain hazar tariq