kahin goyai ke hathon samaat ro rahi hai

kahīñ goyā.ī ke hāthoñ samā.at ro rahī hai

kahīñ lab-basta rah jaane kī hasrat ro rahī hai

kisī dīvār par nāḳhun ne likkhā hai rihā.ī

kisī ghar meñ asīrī kī aziyyat ro rahī hai

kahīñ mimbar pe ḳhush baiThā hai ik sajde kā nashsha

kisī mehrāb ke nīche ibādat ro rahī hai

ye māthe par pasīne kī jo larzish tum ne dekhī

ye ik chehre pe lā-hāsil mashaqqat ro rahī hai

ajab mahfil hai sab ik dūsre par hañs rahe haiñ

ajab tanhā.ī hai ḳhalvat kī ḳhalvat ro rahī hai

ye ḳhāmoshī nahīñ sab iltijā.eñ thak chukī haiñ

ye āñkheñ tar nahīñ rone kī himmat ro rahī hai

jo ba.ad-az-hijr aayā us ko kaise vasl kah duuñ

shikāyat se gale mil kar nadāmat ro rahī hai

ise ġhussa na samjho 'azm' ye mere lahū meñ

musalsal zabt karne kī rivāyat ro rahī hai

kahin goyai ke hathon samaat ro rahi hai

kahin lab-basta rah jaane ki hasrat ro rahi hai

kisi diwar par naKHun ne likkha hai rihai

kisi ghar mein asiri ki aziyyat ro rahi hai

kahin mimbar pe KHush baiTha hai ek sajde ka nashsha

kisi mehrab ke niche ibaadat ro rahi hai

ye mathe par pasine ki jo larzish tum ne dekhi

ye ek chehre pe la-hasil mashaqqat ro rahi hai

ajab mahfil hai sab ek dusre par hans rahe hain

ajab tanhai hai KHalwat ki KHalwat ro rahi hai

ye KHamoshi nahin sab iltijaen thak chuki hain

ye aankhen tar nahin rone ki himmat ro rahi hai

jo baad-az-hijr aaya us ko kaise wasl kah dun

shikayat se gale mil kar nadamat ro rahi hai

ise ghussa na samjho 'azm' ye mere lahu mein

musalsal zabt karne ki riwayat ro rahi hai