jis ne teri aankhon mein shararat nahin dekhi

jis ne tirī āñkhoñ meñ sharārat nahīñ dekhī

vo laakh kahe us ne mohabbat nahīñ dekhī

ik ruup mire ḳhvāb meñ lahrā sā gayā thā

phir dil meñ koī chiiz salāmat nahīñ dekhī

ā.īna tujhe dekh ke gulnār huā thā

shāyad tirī āñkhoñ ne vo rañgat nahīñ dekhī

yuuñ naqsh huā aañkh kī putlī pe vo chehra

phir ham ne kisī aur kī sūrat nahīñ dekhī

ḳhairāt kiyā vo bhī jo maujūd nahīñ thā

tū ne tahī-dastoñ kī saḳhāvat nahīñ dekhī

sad-shukr guzārī hai qayāmat tan-e-tanhā

us raat kisī ne mirī hālat nahīñ dekhī

kyā tujh se kaheñ kaise kaTī kaise kaTegī

achchhā hai ki tū ne ye musībat nahīñ dekhī

shāyad isī baa.is vo firozāñ hai abhī tak

sūraj ne kabhī raat kī zulmat nahīñ dekhī

sab kī tarah tū ne bhī mire aib nikāle

tū ne bhī ḳhudāyā mirī niyyat nahīñ dekhī

tinkā huuñ magar sail ke raste meñ khaḌā huuñ

ai bhāgne vaalo mirī himmat nahīñ dekhī

jo Thaan liyā dil meñ vo kar guzrā huuñ 'shahzād'

aa.ī huī sar par koī aafat nahīñ dekhī

jis ne teri aankhon mein shararat nahin dekhi

wo lakh kahe us ne mohabbat nahin dekhi

ek rup mere KHwab mein lahra sa gaya tha

phir dil mein koi chiz salamat nahin dekhi

aaina tujhe dekh ke gulnar hua tha

shayad teri aankhon ne wo rangat nahin dekhi

yun naqsh hua aankh ki putli pe wo chehra

phir hum ne kisi aur ki surat nahin dekhi

KHairaat kiya wo bhi jo maujud nahin tha

tu ne tahi-daston ki saKHawat nahin dekhi

sad-shukr guzari hai qayamat tan-e-tanha

us raat kisi ne meri haalat nahin dekhi

kya tujh se kahen kaise kaTi kaise kaTegi

achchha hai ki tu ne ye musibat nahin dekhi

shayad isi bais wo firozan hai abhi tak

suraj ne kabhi raat ki zulmat nahin dekhi

sab ki tarah tu ne bhi mere aib nikale

tu ne bhi KHudaya meri niyyat nahin dekhi

tinka hun magar sail ke raste mein khaDa hun

ai bhagne walo meri himmat nahin dekhi

jo Than liya dil mein wo kar guzra hun 'shahzad'

aai hui sar par koi aafat nahin dekhi