jis ne kiye hain phul nichhawar kabhi kabhi

jis ne kiye haiñ phuul nichhāvar kabhī kabhī

aa.e haiñ us kī samt se patthar kabhī kabhī

ham jis ke ho ga.e vo hamārā na ho sakā

yuuñ bhī huā hisāb barābar kabhī kabhī

yaañ tishna-kāmiyāñ to muqaddar haiñ ziist meñ

miltī hai hausle ke barābar kabhī kabhī

aatī hai dhaar un ke karam se shu.ūr meñ

dushman mile haiñ dost se behtar kabhī kabhī

manzil kī justujū meñ jise chhoḌ aa.e the

aatā hai yaad kyuuñ vahī manzar kabhī kabhī

maanā ye zindagī hai fareboñ kā silsila

dekho kisī fareb ke jauhar kabhī kabhī

yuuñ to nashāt-e-kār kī sarshāriyāñ milīñ

anjām-e-kār kā bhī rahā Dar kabhī kabhī

dil kī jo baat thī vo rahī dil meñ ai 'surūr'

khole haiñ garche shauq ke daftar kabhī kabhī

jis ne kiye hain phul nichhawar kabhi kabhi

aae hain us ki samt se patthar kabhi kabhi

hum jis ke ho gae wo hamara na ho saka

yun bhi hua hisab barabar kabhi kabhi

yan tishna-kaamiyan to muqaddar hain zist mein

milti hai hausle ke barabar kabhi kabhi

aati hai dhaar un ke karam se shuur mein

dushman mile hain dost se behtar kabhi kabhi

manzil ki justuju mein jise chhoD aae the

aata hai yaad kyun wahi manzar kabhi kabhi

mana ye zindagi hai farebon ka silsila

dekho kisi fareb ke jauhar kabhi kabhi

yun to nashat-e-kar ki sarshaariyan milin

anjam-e-kar ka bhi raha Dar kabhi kabhi

dil ki jo baat thi wo rahi dil mein ai 'surur'

khole hain garche shauq ke daftar kabhi kabhi