jab dida-e-bina ka hawala nahin milta

jab dīda-e-bīnā kā havāla nahīñ miltā

phir koī bhī duniyā kā havāla nahīñ miltā

vo ālam-e-bālā to tire dil meñ makīñ hai

jis ālam-e-bālā kā havāla nahīñ miltā

aalā meñ to adnā ke havāle hī havāle

adnā hī meñ aalā kā havāla nahīñ miltā

jis jān-e-tamannā ke havāle hai mirī jaañ

us jān-e-tamannā kā havāla nahīñ miltā

ye ruuh savālāt hai yā koī munājāt

kyā miltā hai bas kyā kā havāla nahīñ miltā

ham aaj haiñ aur aaj tū hai kal se bhī aage

achchhā hai jo fardā kā havāla nahīñ miltā

paidā hai to pinhāñ ke havāloñ se bharā hai

pinhāñ se to paidā kā havāla nahīñ miltā

tū apne havāle kī havā khā ke hī ḳhush rah

har aan havāla kā havāla nahīñ miltā

behtar hai ki ab ḳhud se judā ho ke bhī dekheñ

dariyā meñ to dariyā kā havāla nahīñ miltā

'mashkūr' mirī jaan chale aa.e ho tanhā

tanhā ko to tanhā kā havāla nahīñ miltā

jab dida-e-bina ka hawala nahin milta

phir koi bhi duniya ka hawala nahin milta

wo aalam-e-baala to tere dil mein makin hai

jis aalam-e-baala ka hawala nahin milta

aala mein to adna ke hawale hi hawale

adna hi mein aala ka hawala nahin milta

jis jaan-e-tamanna ke hawale hai meri jaan

us jaan-e-tamanna ka hawala nahin milta

ye ruh sawalat hai ya koi munajat

kya milta hai bas kya ka hawala nahin milta

hum aaj hain aur aaj tu hai kal se bhi aage

achchha hai jo farda ka hawala nahin milta

paida hai to pinhan ke hawalon se bhara hai

pinhan se to paida ka hawala nahin milta

tu apne hawale ki hawa kha ke hi KHush rah

har aan hawala ka hawala nahin milta

behtar hai ki ab KHud se juda ho ke bhi dekhen

dariya mein to dariya ka hawala nahin milta

'mashkur' meri jaan chale aae ho tanha

tanha ko to tanha ka hawala nahin milta