ho sakta hai koi hamein bhi DhunDe in banjaron mein

ho saktā hai koī hameñ bhī DhūñDe in banjāroñ meñ

jaane kis kī khoj meñ kab se phirte haiñ bāzāroñ meñ

umr gañvā.ī khoj meñ jis kī DhūñD phire gulzāroñ meñ

qismat kī ye ḳhūbī dekho aan milā vīrānoñ meñ

koī nahīñ jo tere aage husn kā paikar ban kar aa.e

shardhā kī kaliyāñ muskā.eñ qudrat kī sauġhātoñ meñ

aap kī ḳhushiyoñ kī sarhad se duur hamāre Dere haiñ

DhūñDeñge kuchh log hameñ bhī aap ke in afsānoñ meñ

aan mile to bhuul kā jaadū ham donoñ par taarī hai

kaun batā.e kal kyā guzrī furqat kī barsātoñ meñ

marne kī ḳhātir jiinā hī jiine kā dastūr nahīñ

naam hamārā aage hogā duniyā ke nākāroñ meñ

ho sakta hai koi hamein bhi DhunDe in banjaron mein

jaane kis ki khoj mein kab se phirte hain bazaron mein

umr ganwai khoj mein jis ki DhunD phire gulzaron mein

qismat ki ye KHubi dekho aan mila viranon mein

koi nahin jo tere aage husn ka paikar ban kar aae

shardha ki kaliyan muskaen qudrat ki saughaton mein

aap ki KHushiyon ki sarhad se dur hamare Dere hain

DhunDenge kuchh log hamein bhi aap ke in afsanon mein

aan mile to bhul ka jadu hum donon par tari hai

kaun batae kal kya guzri furqat ki barsaton mein

marne ki KHatir jina hi jine ka dastur nahin

nam hamara aage hoga duniya ke nakaron mein