ho gae din jinhen bhulae hue

ho ga.e din jinheñ bhulā.e hue

aaj kal haiñ vo yaad aa.e hue

maiñ ne rāteñ bahut guzārī haiñ

sirf dil kā diyā jalā.e hue

ek usī shaḳhs kā nahīñ mazkūr

ham zamāne ke haiñ satā.e hue

sone aate haiñ log bastī meñ

saare din ke thake-thakā.e hue

muskurā.e baġhair bhī vo hoñT

nazar aate haiñ muskurā.e hue

go falak pe nahīñ palak pe sahī

do sitāre haiñ jagmagā.e hue

ai 'shu.ūr' aur koī baat karo

haiñ ye qisse sune-sunā.e hue

ho gae din jinhen bhulae hue

aaj kal hain wo yaad aae hue

main ne raaten bahut guzari hain

sirf dil ka diya jalae hue

ek usi shaKHs ka nahin mazkur

hum zamane ke hain satae hue

sone aate hain log basti mein

sare din ke thake-thakae hue

muskurae baghair bhi wo honT

nazar aate hain muskurae hue

go falak pe nahin palak pe sahi

do sitare hain jagmagae hue

ai 'shuur' aur koi baat karo

hain ye qisse sune-sunae hue