hijab uTThe hain lekin wo ru-ba-ru to nahin

hijāb uTThe haiñ lekin vo rū-ba-rū to nahīñ

sharīk-e-ishq kahīñ koī aarzū to nahīñ

ye ḳhud-farebi-e-ehsās-e-ārzū to nahīñ

tirī talāsh kahīñ apnī justujū to nahīñ

sukūt vo bhī musalsal sukūt kyā ma.anī

kahīñ yahī tirā andāz-e-guftugū to nahīñ

unheñ bhī kar diyā betāb-e-ārzū kis ne

mirī nigāh-e-mohabbat kahīñ ye tū to nahīñ

kahāñ ye ishq kā aalam kahāñ vo husn-e-tamām

ye sochtā huuñ ki maiñ apne rū-ba-rū to nahīñ

nigāh-e-shauq se ġhāfil samajh na jalvoñ ko

sharāb kuchh bhī ho be-gāna-e-subū to nahīñ

ḳhushī se tark-e-mohabbat kā ahd le ai dost

magar ye dekh tirā dil lahū lahū to nahīñ

na gard-e-rāh hai ruḳh par na aañkh meñ aañsū

ye justujū bhī sahī us kī justujū to nahīñ

chaman meñ rakhte haiñ kāñTe bhī ik maqām ai dost

faqat guloñ se hī gulshan kī aabrū to nahīñ

hijab uTThe hain lekin wo ru-ba-ru to nahin

sharik-e-ishq kahin koi aarzu to nahin

ye KHud-farebi-e-ehsas-e-arzu to nahin

teri talash kahin apni justuju to nahin

sukut wo bhi musalsal sukut kya mani

kahin yahi tera andaz-e-guftugu to nahin

unhen bhi kar diya betab-e-arzu kis ne

meri nigah-e-mohabbat kahin ye tu to nahin

kahan ye ishq ka aalam kahan wo husn-e-tamam

ye sochta hun ki main apne ru-ba-ru to nahin

nigah-e-shauq se ghafil samajh na jalwon ko

sharab kuchh bhi ho be-gana-e-subu to nahin

KHushi se tark-e-mohabbat ka ahd le ai dost

magar ye dekh tera dil lahu lahu to nahin

na gard-e-rah hai ruKH par na aankh mein aansu

ye justuju bhi sahi us ki justuju to nahin

chaman mein rakhte hain kanTe bhi ek maqam ai dost

faqat gulon se hi gulshan ki aabru to nahin