har zarra-e-KHaki ko kiran humne banaya

har zarra-e-ḳhākī ko kiran ham ne banāyā

miTTī ko lahū de ke chaman ham ne banāyā

thā husn magar ik nigah-e-nīm-razā se

gesū-ba-kamar lāla-shikan ham ne banāyā

sad-shukr ki hai un kā tabassum bhī hamīñ par

kaliyoñ meñ jinheñ ġhuncha-dahan ham ne banāyā

aġhyār ko gul-pairahanī ham ne atā kī

apne liye phūloñ kā kafan ham ne banāyā

har jazba-e-āzādī-e-fitrat ko huā dī

har bāda-e-paimāna-shikan ham ne banāyā

tārīḳh-e-junūñ ye hai ki har daur-e-ḳhirad meñ

ik silsila-e-dār-o-rasan ham ne banāyā

Darte haiñ ḳhamoshī se hamārī mah-o-anjum

chup rah ke vo andāz-e-suḳhan ham ne banāyā

Takrā.e kabhī mauj se sāhil pe kabhī haiñ

bahte hue dariyā meñ vatan ham ne banāyā

mustaqbil-e-tahzīb kā naġhma vahī Thahrā

jo zamzama-e-gañg-o-jaman ham ne banāyā

ashkoñ se hamāre hai munavvar na.ī duniyā

shabnam ko ziyā dī to karan ham ne banāyā

āfāq kā har jalva 'nushūr' is meñ ayaañ hai

mil-jul ke vo ā.īna-e-fan ham ne banāyā

har zarra-e-KHaki ko kiran hum ne banaya

miTTi ko lahu de ke chaman hum ne banaya

tha husn magar ek nigah-e-nim-raza se

gesu-ba-kamar lala-shikan hum ne banaya

sad-shukr ki hai un ka tabassum bhi hamin par

kaliyon mein jinhen ghuncha-dahan hum ne banaya

aghyar ko gul-pairahani hum ne ata ki

apne liye phulon ka kafan hum ne banaya

har jazba-e-azadi-e-fitrat ko hua di

har baada-e-paimana-shikan hum ne banaya

tariKH-e-junun ye hai ki har daur-e-KHirad mein

ek silsila-e-dar-o-rasan hum ne banaya

Darte hain KHamoshi se hamari mah-o-anjum

chup rah ke wo andaz-e-suKHan hum ne banaya

Takrae kabhi mauj se sahil pe kabhi hain

bahte hue dariya mein watan hum ne banaya

mustaqbil-e-tahzib ka naghma wahi Thahra

jo zamzama-e-gang-o-jaman hum ne banaya

ashkon se hamare hai munawwar nai duniya

shabnam ko ziya di to karan hum ne banaya

aafaq ka har jalwa 'nushur' is mein ayan hai

mil-jul ke wo aaina-e-fan hum ne banaya