har uzw musafir hai nahin kuchh safari aankh

har uzv musāfir hai nahīñ kuchh safarī aañkh

hai āḳhir-e-shab umr charāġh-e-saharī aañkh

kyā kartī hai dilkash suḳhan ai rashk-e-parī aañkh

lo siikh ga.ī tarz-e-kalām-e-bashrī aañkh

un āñkhoñ meñ sāne.a ne bhare kuuT ke motī

qismat ye hamārī hai ki ashkoñ se bharī aañkh

bāteñ jo karo naaz se tum muñh ko chhupā kar

sunñe ke liye kaan ho ai rashk-e-parī aañkh

aayā hai mire dil kā ġhubār āñsuoñ ke saath

lo ab to huī mālik-e-ḳhushkī-o-tarī aañkh

ab tak vahī ronā hai vahī hasrat-e-dīdār

ham mar ga.e is par bhī ye kāfir na marī aañkh

tayyār kiyā ḳhāma-e-mū apne mizha se

khīñcheñge magar naqsha-e-nāzuk kamrī aañkh

nargis pe nazar kiije dobāra ki vo kaT jaa.e

ho jaa.e nazar-e-sānī meñ is kī nazarī aañkh

sohbat kā asar sāhab-e-bīnish ko ho kyūñkar

ainak ho agar sabz na ho jaa.e harī aañkh

bātoñ ko zabāñ misl-e-suḳhan muñh se nikal jaa.e

nazzāre ko ho pā-e-nigah se safarī aañkh

tīr-e-mizha-e-yār ko mizhgāñ hī samajhte

kis aañkh se laḌte hī sadā balbe jarī aañkh

raftār to dikhlā ke za-ḳhud rafta banā do

nargis kī tarah hai hama-tan kabk-e-darī aañkh

dāman kī tarah chaak hue aañkh ke parde

o dast-e-junūñ se ki ga.ī jāma-darī aañkh

jo ahl-e-nazar meñ kabhī ḳhud-bīñ nahīñ hotī

dekho ki hai is aib-e-numāyāñ se barī aañkh

kyā qahr sivā āyat-e-abrū huī nāzil

Dar hai na kare da.ava-e-paiġhāmbarī aañkh

kashtī vo liye nuuh kī mānind chale aa.eñ

tūfān bapā kar shab-e-furqat meñ arī aañkh

rahte haiñ 'vazīr' ashk kī jā TukḌe jigar ke

in rozoñ huī kān-e-aqīq-e-jigrī aañkh

har uzw musafir hai nahin kuchh safari aankh

hai aaKHir-e-shab umr charagh-e-sahari aankh

kya karti hai dilkash suKHan ai rashk-e-pari aankh

lo sikh gai tarz-e-kalam-e-bashri aankh

un aankhon mein sanea ne bhare kuT ke moti

qismat ye hamari hai ki ashkon se bhari aankh

baaten jo karo naz se tum munh ko chhupa kar

sunne ke liye kan ho ai rashk-e-pari aankh

aaya hai mere dil ka ghubar aansuon ke sath

lo ab to hui malik-e-KHushki-o-tari aankh

ab tak wahi rona hai wahi hasrat-e-didar

hum mar gae is par bhi ye kafir na mari aankh

tayyar kiya KHama-e-mu apne mizha se

khinchenge magar naqsha-e-nazuk kamri aankh

nargis pe nazar kije dobara ki wo kaT jae

ho jae nazar-e-sani mein is ki nazari aankh

sohbat ka asar sahab-e-binish ko ho kyunkar

ainak ho agar sabz na ho jae hari aankh

baaton ko zaban misl-e-suKHan munh se nikal jae

nazzare ko ho pa-e-nigah se safari aankh

tir-e-mizha-e-yar ko mizhgan hi samajhte

kis aankh se laDte hi sada balbe jari aankh

raftar to dikhla ke za-KHud rafta bana do

nargis ki tarah hai hama-tan kabk-e-dari aankh

daman ki tarah chaak hue aankh ke parde

o dast-e-junun se ki gai jama-dari aankh

jo ahl-e-nazar mein kabhi KHud-bin nahin hoti

dekho ki hai is aib-e-numayan se bari aankh

kya qahr siwa aayat-e-abru hui nazil

Dar hai na kare dawa-e-paighambari aankh

kashti wo liye nuh ki manind chale aaen

tufan bapa kar shab-e-furqat mein ari aankh

rahte hain 'wazir' ashk ki ja TukDe jigar ke

in rozon hui kan-e-aqiq-e-jigri aankh