hum jo insan ke gham uThate hain

ham jo insāñ ke ġham uThāte haiñ

ḳhuub ko ḳhūb-tar banāte haiñ

zindagī ḳhvāb hī sahī lekin

ḳhvāb ta.abīr chhoḌ jaate haiñ

be-haqīqat masarratoñ ke liye

zindagī bhar fareb khāte haiñ

māñgte haiñ duā.eñ jiine kī

aur jiinā hī bhuul jaate haiñ

sochī-samjhī vahī tamannā.eñ

roz ḳhāke na.e banāte haiñ

aap se yaad aap kī achchhī

aap to ham ko bhuul jaate haiñ

kārvān-e-hayāt meñ ḳhud ko

har qadam ajnabī sā paate haiñ

jab bhī bantā hai koī shīsh-mahal

kitne ā.īne TuuT jaate haiñ

zehn-o-dil kī riqābateñ tauba

kaise kaise ḳhayāl aate haiñ

dostī kyā hai ḳhud-satā.ī hai

sab 'matīn' apne kaam aate haiñ

hum jo insan ke gham uThate hain

KHub ko KHub-tar banate hain

zindagi KHwab hi sahi lekin

KHwab tabir chhoD jate hain

be-haqiqat masarraton ke liye

zindagi bhar fareb khate hain

mangte hain duaen jine ki

aur jina hi bhul jate hain

sochi-samjhi wahi tamannaen

roz KHake nae banate hain

aap se yaad aap ki achchhi

aap to hum ko bhul jate hain

karwan-e-hayat mein KHud ko

har qadam ajnabi sa pate hain

jab bhi banta hai koi shish-mahal

kitne aaine TuT jate hain

zehn-o-dil ki riqabaten tauba

kaise kaise KHayal aate hain

dosti kya hai KHud-satai hai

sab 'matin' apne kaam aate hain