hai ghazal mir ye shifai ki

hai ġhazal 'mīr' ye 'shifā.ī' kī

ham ne bhī tab.a-āzmā.ī kī

us ke īfā-e-ahd tak na jiye

umr ne ham se bevafā.ī kī

vasl ke din kī aarzū hī rahī

shab na āḳhir huī judā.ī kī

isī taqrīb us galī meñ rahe

minnateñ haiñ shikasta-pā.ī kī

dil meñ us shoḳh ke na kī tāsīr

aah ne aah nā-rasā.ī kī

kāsa-e-chashm le ke juuñ nargis

ham ne dīdār kī gadā.ī kī

zor o zar kuchh na thā to bār-e-'mīr'

kis bharose par āshnā.ī kī

hai ghazal 'mir' ye 'shifai' ki

hum ne bhi taba-azmai ki

us ke ifa-e-ahd tak na jiye

umr ne hum se bewafai ki

wasl ke din ki aarzu hi rahi

shab na aaKHir hui judai ki

isi taqrib us gali mein rahe

minnaten hain shikasta-pai ki

dil mein us shoKH ke na ki tasir

aah ne aah na-rasai ki

kasa-e-chashm le ke jun nargis

hum ne didar ki gadai ki

zor o zar kuchh na tha to bar-e-'mir'

kis bharose par aashnai ki