garche har samt masail ke hain ambar bahut

garche har samt masā.il ke haiñ ambār bahut

apnī taqrīr pe hai shaiḳh ko isrār bahut

ham ne maanā ki tire shahr meñ sab achchhā hai

koī iisā ho to mil jā.eñge bīmār bahut

nā-sapāsī kā samar dar-ba-darī hai yaaro

yaad aa.egī ye TuuTī huī dīvār bahut

aaj phir qāfila-e-haq kā ḳhudā hāfiz hai

shahr vāloñ meñ nahīñ jur.at-e-inkār bahut

ham jo afrañg se haare haiñ to do bātoñ par

vaqt kī qadr nahīñ garmi-e-guftār bahut

qissa-e-ḳhair na chhupne ke bahāne lākhoñ

ḳhabar-e-bad pe uchhalte haiñ ye aḳhbār bahut

baat sunñe ke liye sirf havā.eñ 'ḳhālid'

baat karne ke liye dost bahut yaar bahut

garche har samt masail ke hain ambar bahut

apni taqrir pe hai shaiKH ko israr bahut

hum ne mana ki tere shahr mein sab achchha hai

koi isa ho to mil jaenge bimar bahut

na-sapasi ka samar dar-ba-dari hai yaro

yaad aaegi ye TuTi hui diwar bahut

aaj phir qafila-e-haq ka KHuda hafiz hai

shahr walon mein nahin jurat-e-inkar bahut

hum jo afrang se haare hain to do baaton par

waqt ki qadr nahin garmi-e-guftar bahut

qissa-e-KHair na chhupne ke bahane lakhon

KHabar-e-bad pe uchhalte hain ye aKHbar bahut

baat sunne ke liye sirf hawaen 'KHalid'

baat karne ke liye dost bahut yar bahut