faqirana tabiat thi bahut bebak lahja tha

faqīrāna tabī.at thī bahut bebāk lahja thā

kabhī mujh meñ bhī hañstā-kheltā ik shaḳhs rahtā thā

bagūle hī bagūle haiñ mirī vīrān āñkhoñ meñ

kabhī in rahguzāroñ meñ koī dariyā bhī bahtā thā

tujhe jab dekhtā huuñ to ḳhud apnī yaad aatī hai

mirā andāz hañsne kā kabhī tere hī jaisā thā

kabhī parvāz par merī hazāroñ dil dhaḌakte the

duā kartā thā koī to koī ḳhush-bāsh kahtā thā

kabhī aise hī chhā.ī thiiñ gulābī badliyāñ mujh par

kabhī phūloñ kī sohbat se mirā dāman bhī mahkā thā

maiñ thā jab kārvāñ ke saath to gulzār thī duniyā

magar tanhā huā to har taraf sahrā hī sahrā thā

bas itnā yaad hai soyā thā ik ummīd sī le kar

lahū se bhar ga.iiñ āñkheñ na jaane ḳhvāb kaisā thā

faqirana tabiat thi bahut bebak lahja tha

kabhi mujh mein bhi hansta-khelta ek shaKHs rahta tha

bagule hi bagule hain meri viran aankhon mein

kabhi in rahguzaron mein koi dariya bhi bahta tha

tujhe jab dekhta hun to KHud apni yaad aati hai

mera andaz hansne ka kabhi tere hi jaisa tha

kabhi parwaz par meri hazaron dil dhaDakte the

dua karta tha koi to koi KHush-bash kahta tha

kabhi aise hi chhai thin gulabi badliyan mujh par

kabhi phulon ki sohbat se mera daman bhi mahka tha

main tha jab karwan ke sath to gulzar thi duniya

magar tanha hua to har taraf sahra hi sahra tha

bas itna yaad hai soya tha ek ummid si le kar

lahu se bhar gain aankhen na jaane KHwab kaisa tha