ek jhonka is tarah zanjir-e-dar khaDka gaya

ek jhoñkā is tarah zanjīr-e-dar khaḌkā gayā

maiñ ye samjhā bhūlne vaale ko maiñ yaad aa gayā

umr bhar kī baat bigḌī ik zarā sī baat meñ

ek lamha zindagī bhar kī kamā.ī khā gayā

ai zamīñ tujh ko mohabbat se basāne ke liye

āsmānoñ kī bulandī se mujhe pheñkā gayā

inqilāb-e-dahr bar-haq lekin aisā inqalāb

vo kahīñ paa.e ga.e aur maiñ kahīñ paayā gayā

ā.īna dikhlāne aa.e the pareshānī ke din

thā mirā chehra magar mujh se na pahchānā gayā

aap ne apnī zabāñ se jis ko apnā kah diyā

vo divāna har jagah khoyā huā paayā gayā

ḳhairiyat kyā pūchhte ho gesū-e-hālāt kī

vaqt hī uljhā gayā thā vaqt hī suljhā gayā

us taraf jaate hue ab dil dahaltā hai 'nazīr'

zindagī meñ jis taraf se bār-hā aayā gayā

ek jhonka is tarah zanjir-e-dar khaDka gaya

main ye samjha bhulne wale ko main yaad aa gaya

umr bhar ki baat bigDi ek zara si baat mein

ek lamha zindagi bhar ki kamai kha gaya

ai zamin tujh ko mohabbat se basane ke liye

aasmanon ki bulandi se mujhe phenka gaya

inqilab-e-dahr bar-haq lekin aisa inqalab

wo kahin pae gae aur main kahin paya gaya

aaina dikhlane aae the pareshani ke din

tha mera chehra magar mujh se na pahchana gaya

aap ne apni zaban se jis ko apna kah diya

wo diwana har jagah khoya hua paya gaya

KHairiyat kya puchhte ho gesu-e-haalat ki

waqt hi uljha gaya tha waqt hi suljha gaya

us taraf jate hue ab dil dahalta hai 'nazir'

zindagi mein jis taraf se bar-ha aaya gaya