dur tak chhae the baadal aur kahin saya na tha

duur tak chhā.e the bādal aur kahīñ saaya na thā

is tarah barsāt kā mausam kabhī aayā na thā

surḳh aahan par Tapaktī buuñd hai ab har ḳhushī

zindagī ne yuuñ to pahle ham ko tarsāyā na thā

kyā milā āḳhir tujhe sāyoñ ke pīchhe bhaag kar

ai dil-e-nādāñ tujhe kyā ham ne samjhāyā na thā

uf ye sannāTā ki aahaT tak na ho jis meñ muḳhil

zindagī meñ is qadar ham ne sukūñ paayā na thā

ḳhuub ro.e chhup ke ghar kī chār-dīvārī meñ ham

hāl-e-dil kahne ke qābil koī ham-sāya na thā

ho ga.e qallāsh jab se aas kī daulat luTī

paas apne aur to koī bhī sarmāya na thā

vo payambar ho ki āshiq qatl-gāh-e-shauq meñ

taaj kāñToñ kā kise duniyā ne pahnāyā na thā

ab khulā jhoñkoñ ke pīchhe chal rahī thiiñ āñdhiyāñ

ab jo manzar hai vo pahle to nazar aayā na thā

sirf ḳhushbū kī kamī thī ġhaur ke qābil 'qatīl'

varna gulshan meñ koī bhī phuul murjhāyā na thā

dur tak chhae the baadal aur kahin saya na tha

is tarah barsat ka mausam kabhi aaya na tha

surKH aahan par Tapakti bund hai ab har KHushi

zindagi ne yun to pahle hum ko tarsaya na tha

kya mila aaKHir tujhe sayon ke pichhe bhag kar

ai dil-e-nadan tujhe kya hum ne samjhaya na tha

uf ye sannaTa ki aahaT tak na ho jis mein muKHil

zindagi mein is qadar hum ne sukun paya na tha

KHub roe chhup ke ghar ki chaar-diwari mein hum

haal-e-dil kahne ke qabil koi ham-saya na tha

ho gae qallash jab se aas ki daulat luTi

pas apne aur to koi bhi sarmaya na tha

wo payambar ho ki aashiq qatl-gah-e-shauq mein

taj kanTon ka kise duniya ne pahnaya na tha

ab khula jhonkon ke pichhe chal rahi thin aandhiyan

ab jo manzar hai wo pahle to nazar aaya na tha

sirf KHushbu ki kami thi ghaur ke qabil 'qatil'

warna gulshan mein koi bhi phul murjhaya na tha