dost ka ghar aur dushman ka pata malum hai

dost kā ghar aur dushman kā pata ma.alūm hai

zindagī ham ko tirā ye silsila ma.alūm hai

zindagī jā ham bhī kū-e-ārzū tak aa ga.e

is ke aage ham ko saarā rāsta ma.alūm hai

kyā munajjim se kareñ ham apne mustaqbil kī baat

haal ke baare meñ ham ko kaun sā ma.alūm hai

yā to jo nā-fahm haiñ vo bolte haiñ in dinoñ

yā jinheñ ḳhāmosh rahne kī sazā ma.alūm hai

sher par to aap kī qudarat musallam hai 'shujā'

is zamāne kā bhī kuchh achchhā burā ma.alūm hai

dost ka ghar aur dushman ka pata malum hai

zindagi hum ko tera ye silsila malum hai

zindagi ja hum bhi ku-e-arzu tak aa gae

is ke aage hum ko sara rasta malum hai

kya munajjim se karen hum apne mustaqbil ki baat

haal ke bare mein hum ko kaun sa malum hai

ya to jo na-fahm hain wo bolte hain in dinon

ya jinhen KHamosh rahne ki saza malum hai

sher par to aap ki qudarat musallam hai 'shuja'

is zamane ka bhi kuchh achchha bura malum hai