din guzarte rahe sanson mein thakan aati rahi

din guzarte rahe sāñsoñ meñ thakan aatī rahī

dil meñ uḌ uḌ ke vahī gard-e-mehan aatī rahī

thak ga.e arsa-e-ehsās meñ chalte chalte

raah meñ hasrat-e-kotāhī-e-fan aatī rahī

bas darīche se lage baiThe rahe ahl-e-safar

sabza jaltā rahā aur yād-e-vatan aatī rahī

gulshan-e-dahr meñ kuchh bū-e-vafā baaqī hai

ki ḳhizāñ meñ bhī sabā sū-e-chaman aatī rahī

phuul āñkhoñ se guzar kar tah-e-dil meñ bhī khilā

rut bhī badlī to vahī bū-e-saman aatī rahī

ahl-e-duniyā zar-o-gauhar kī tamannā meñ rahe

os paḌtī rahī sūraj kī kiran aatī rahī

ham kabhī chāk-garebāñ the kabhī ḳhāk-basar

kar guzarte rahe jo 'ishq meñ ban aatī rahī

din guzarte rahe sanson mein thakan aati rahi

dil mein uD uD ke wahi gard-e-mehan aati rahi

thak gae arsa-e-ehsas mein chalte chalte

rah mein hasrat-e-kotahi-e-fan aati rahi

bas dariche se lage baiThe rahe ahl-e-safar

sabza jalta raha aur yaad-e-watan aati rahi

gulshan-e-dahr mein kuchh bu-e-wafa baqi hai

ki KHizan mein bhi saba su-e-chaman aati rahi

phul aankhon se guzar kar tah-e-dil mein bhi khila

rut bhi badli to wahi bu-e-saman aati rahi

ahl-e-duniya zar-o-gauhar ki tamanna mein rahe

os paDti rahi suraj ki kiran aati rahi

hum kabhi chaak-gareban the kabhi KHak-basar

kar guzarte rahe jo 'ishq mein ban aati rahi