dil kisi mushtaq ka ThanDa kiya

dil kisī mushtāq kā ThanDā kiyā

ḳhuub kiyā aap ne achchhā kiyā

aaj hayā aañkh kī kuchh aur hai

chāhne vaalā koī paidā kiyā

haa.e re paimāñ-shikanī ke maze

jab maiñ gayā vāda-e-fardā kiyā

kuchh to kisī ne unheñ samjhā diyā

ham jo ga.e aaj to parda kiyā

go ki na thā merī taraf muñh magar

tirchhī nigāhoñ se vo dekhā kiyā

aah kī taqsīr nahīñ hai magar

be-asarī ne mujhe rusvā kiyā

kah ke le aate haiñ tumheñ hoshiyār

ye na kiyā ham ne to phir kyā kiyā

maut ke sadqe ki ye kahte the vo

aaj na us ne koī pherā kiyā

aap ke ehsān kī tārīf hai

maiñ ne agar shikva-e-a.adā kiyā

naam merā sunte hī sharmā ga.e

tum ne to ḳhud aap ko rusvā kiyā

qadr mirī tum ne na kī varna maiñ

kyā kahūñ kyā aap ko samjhā kiyā

maiñ ne to ai jān-e-jahāñ jaan dī

tum ne adā haqq-e-vafā kyā kiyā

phir vo nahā.e araq-e-sharm meñ

kis ne mire ishq kā charchā kiyā

maiñ dil-e-sad-chāk kā kahtā thā haal

shāna abas zulf se uljhā kiyā

us kī nazar meñ huā halkā 'nasīm'

mujh se mire shauq ne kyā kyā kiyā

dil kisi mushtaq ka ThanDa kiya

KHub kiya aap ne achchha kiya

aaj haya aankh ki kuchh aur hai

chahne wala koi paida kiya

hae re paiman-shikani ke maze

jab main gaya wada-e-farda kiya

kuchh to kisi ne unhen samjha diya

hum jo gae aaj to parda kiya

go ki na tha meri taraf munh magar

tirchhi nigahon se wo dekha kiya

aah ki taqsir nahin hai magar

be-asari ne mujhe ruswa kiya

kah ke le aate hain tumhein hoshiyar

ye na kiya hum ne to phir kya kiya

maut ke sadqe ki ye kahte the wo

aaj na us ne koi phera kiya

aap ke ehsan ki tarif hai

main ne agar shikwa-e-ada kiya

nam mera sunte hi sharma gae

tum ne to KHud aap ko ruswa kiya

qadr meri tum ne na ki warna main

kya kahun kya aap ko samjha kiya

main ne to ai jaan-e-jahan jaan di

tum ne ada haqq-e-wafa kya kiya

phir wo nahae araq-e-sharm mein

kis ne mere ishq ka charcha kiya

main dil-e-sad-chaak ka kahta tha haal

shana abas zulf se uljha kiya

us ki nazar mein hua halka 'nasim'

mujh se mere shauq ne kya kya kiya