dil ki maujon ki taDap meri sada mein aae

dil kī maujoñ kī taḌap merī sadā meñ aa.e

dā.ere karb ke phaile to havā meñ aa.e

mere hāthoñ hī ne ā.īna dikhāyā thā mujhe

kitne mushkil the taqāze jo duā meñ aa.e

ham ġharībī meñ bhī me.ār-e-safar rakhte haiñ

girte paḌte hī sahī apnī anā meñ aa.e

in se ham sher kī tāsīr baḌhā lete haiñ

kaise lahje tire āñchal kī havā meñ aa.e

vo to pahchān kī mauhūm nazar rakhtā hai

ham yūñhī sāmne zaḳhmoñ kī qabā meñ aa.e

āḳhirī sher kī manzil bhī kaḌī hai 'sāqib'

soch ke kitne safar zehn-e-rasā meñ aa.e

dil ki maujon ki taDap meri sada mein aae

daere karb ke phaile to hawa mein aae

mere hathon hi ne aaina dikhaya tha mujhe

kitne mushkil the taqaze jo dua mein aae

hum gharibi mein bhi mear-e-safar rakhte hain

girte paDte hi sahi apni ana mein aae

in se hum sher ki tasir baDha lete hain

kaise lahje tere aanchal ki hawa mein aae

wo to pahchan ki mauhum nazar rakhta hai

hum yunhi samne zaKHmon ki qaba mein aae

aaKHiri sher ki manzil bhi kaDi hai 'saqib'

soch ke kitne safar zehn-e-rasa mein aae