bujhte hue charagh farozan karenge hum

bujhte hue charāġh farozāñ kareñge ham

tum aaoge to jashn-e-charāġhāñ kareñge ham

baaqī hai ḳhāk-e-kū-e-mohabbat kī tishnagī

apne lahū ko aur bhī arzāñ kareñge ham

bechārgī ke ho ga.e ye chārāgar shikār

ab ḳhud hī apne dard kā darmāñ kareñge ham

josh-e-junūñ se jāma-e-hastī hai tār-tār

kyūñkar ilāj-e-tañgi-e-dāmāñ kareñge ham

ai chārasāz dil kī lagī kā hai kyā ilaaj

kahne se tere sair-e-gulistāñ kareñge ham

kyā ġham jo hasratoñ ke diye bujh ga.e tamām

dāġhoñ se aaj ghar meñ charāġhāñ kareñge ham

'vāsif' kā intizār hai tham jaao dosto

dam bhar meñ tai hudūd-e-bayābāñ kareñge ham

bujhte hue charagh farozan karenge hum

tum aaoge to jashn-e-charaghan karenge hum

baqi hai KHak-e-ku-e-mohabbat ki tishnagi

apne lahu ko aur bhi arzan karenge hum

bechaargi ke ho gae ye chaaragar shikar

ab KHud hi apne dard ka darman karenge hum

josh-e-junun se jama-e-hasti hai tar-tar

kyunkar ilaj-e-tangi-e-daman karenge hum

ai chaarasaz dil ki lagi ka hai kya ilaj

kahne se tere sair-e-gulistan karenge hum

kya gham jo hasraton ke diye bujh gae tamam

daghon se aaj ghar mein charaghan karenge hum

'wasif' ka intizar hai tham jao dosto

dam bhar mein tai hudud-e-bayaban karenge hum