bujhe ho, hath mayusi lagi hai kya

bujhe ho, haath māyūsī lagī hai kyā

dar-e-ulfat pe ab kunDī lagī hai kyā

abhī bhī tujh dar-e-dil par batā jānāñ

hamāre naam kī taḳhtī lagī hai kyā

samundar baukhalāyā phir rahā hai kyuuñ

kināre phir koī kashtī lagī hai kyā

hamīñ tum se hamesha milne aa.eñ kyuuñ

tumhāre paañv meñ mehñdī lagī hai kyā

kaTe haiñ par to kaTne do miyāñ socho

irādoñ par koī qaiñchī lagī hai kyā

jahāñ kal ishq par charchā huā ghanToñ

vahīñ ab husn kī manDī lagī hai kyā

haiñ āñkheñ surḳh lab zaḳhmī anā ghāyal

tire kirdār kī bolī lagī hai kyā

tirī galiyoñ se jo guzrā use jānāñ

bhalā duniyā kabhī achchhī lagī hai kyā

yaqīnan aaj be-parda vo nikle haiñ

vagarna chāñdnī phīkī lagī hai kyā

na duniyā hai na uljhan hai sukūñ hai bas

Thikāne ab mirī miTTī lagī hai kyā

kitābeñ ghar mire sūraj sī raushan haiñ

tire kamre meñ ye battī lagī hai kyā

zabāñ se aah kyā uf tak nahīñ niklī

to ab ke choT kuchh gahrī lagī hai kyā

miTā loge jihālat ko 'sikandar' tum

tumheñ bhī ye na.ī dhunkī lagī hai kyā

bujhe ho, hath mayusi lagi hai kya

dar-e-ulfat pe ab kunDi lagi hai kya

abhi bhi tujh dar-e-dil par bata jaanan

hamare nam ki taKHti lagi hai kya

samundar baukhalaya phir raha hai kyun

kinare phir koi kashti lagi hai kya

hamin tum se hamesha milne aaen kyun

tumhaare panw mein mehndi lagi hai kya

kaTe hain par to kaTne do miyan socho

iradon par koi qainchi lagi hai kya

jahan kal ishq par charcha hua ghanTon

wahin ab husn ki manDi lagi hai kya

hain aankhen surKH lab zaKHmi ana ghayal

tere kirdar ki boli lagi hai kya

teri galiyon se jo guzra use jaanan

bhala duniya kabhi achchhi lagi hai kya

yaqinan aaj be-parda wo nikle hain

wagarna chandni phiki lagi hai kya

na duniya hai na uljhan hai sukun hai bas

Thikane ab meri miTTi lagi hai kya

kitaben ghar mere suraj si raushan hain

tere kamre mein ye batti lagi hai kya

zaban se aah kya uf tak nahin nikli

to ab ke choT kuchh gahri lagi hai kya

miTa loge jihaalat ko 'sikandar' tum

tumhein bhi ye nai dhunki lagi hai kya