apni duniya KHud ba-faiz-e-gham bana sakta hun main

apnī duniyā ḳhud ba-faiz-e-ġham banā saktā huuñ maiñ

ik jahān-e-shauq-e-nā-mohkam banā saktā huuñ maiñ

merī āñkhoñ meñ haiñ aañsū tere dāman meñ bahār

gul banā saktā hai tū shabnam banā saktā huuñ maiñ

dil ke baaje meñ nahīñ ma.alūm kitne taar haiñ

husn ko ik taar kā mahram banā saktā huuñ maiñ

phir haqīqat kī usī jannat kī jānib lauT kar

bandagī ko laġhzish-e-ādam banā saktā huuñ maiñ

hāsil-e-ashk-e-nadāmat kuchh nahīñ is ke sivā

hai jo dāman tar usī ko nam banā saktā huuñ maiñ

ishq huuñ mere liye pās-e-hudūd-e-hosh kyā

ho ke dīvāna bhī ik aalam banā saktā huuñ maiñ

jis qadar aañsū gire utnā hī insāñ ho sakā

zindagī shāyad ba-qadr-e-ġham banā saktā huuñ maiñ

ḳhud-shanāsī kī sharāb-e-ātishīñ bhar kar 'nushūr'

kāsa-e-muflis ko jām-e-jam banā saktā huuñ maiñ

apni duniya KHud ba-faiz-e-gham bana sakta hun main

ek jahan-e-shauq-e-na-mohkam bana sakta hun main

meri aankhon mein hain aansu tere daman mein bahaar

gul bana sakta hai tu shabnam bana sakta hun main

dil ke baje mein nahin malum kitne tar hain

husn ko ek tar ka mahram bana sakta hun main

phir haqiqat ki usi jannat ki jaanib lauT kar

bandagi ko laghzish-e-adam bana sakta hun main

hasil-e-ashk-e-nadamat kuchh nahin is ke siwa

hai jo daman tar usi ko nam bana sakta hun main

ishq hun mere liye pas-e-hudud-e-hosh kya

ho ke diwana bhi ek aalam bana sakta hun main

jis qadar aansu gire utna hi insan ho saka

zindagi shayad ba-qadr-e-gham bana sakta hun main

KHud-shanasi ki sharab-e-atishin bhar kar 'nushur'

kasa-e-muflis ko jam-e-jam bana sakta hun main