ab aur chalne ka is dil mein hausla hi na tha

ab aur chalne kā is dil meñ hausla hī na thā

ki shahr-e-shab meñ ujāle kā shā.iba hī na thā

maiñ us galī meñ gayā le ke zo.am-e-rusvā.ī

magar mujhe to vahāñ koī jāntā hī na thā

gudāz-e-jāñ se liyā maiñ ne phir ġhazal kā surāġh

ki ye charāġh to jaise kabhī bujhā hī na thā

koī pukāre kisī ko to ḳhud hī kho jaa.e

huā to hai magar aisā kabhī sunā hī na thā

kise kaheñ ki rifāqat kā daaġh hai dil par

bichhaḌne vaalā to khul kar kabhī milā hī na thā

musāfiroñ ko ka.ī vāhime satāte haiñ

Thaharte kyā ki darīchoñ meñ to diyā hī na thā

damak uThā thā vo chehra hayā kī chādar meñ

ki jaise jurm-e-vafā us kā mudda.ā hī na thā

hamāre haath faqat ret ke sadaf aa.e

ki sāhiloñ pe sitāra koī rahā hī na thā

ab aur chalne ka is dil mein hausla hi na tha

ki shahr-e-shab mein ujale ka shaiba hi na tha

main us gali mein gaya le ke zoam-e-ruswai

magar mujhe to wahan koi jaanta hi na tha

gudaz-e-jaan se liya main ne phir ghazal ka suragh

ki ye charagh to jaise kabhi bujha hi na tha

koi pukare kisi ko to KHud hi kho jae

hua to hai magar aisa kabhi suna hi na tha

kise kahen ki rifaqat ka dagh hai dil par

bichhaDne wala to khul kar kabhi mila hi na tha

musafiron ko kai wahime satate hain

Thaharte kya ki darichon mein to diya hi na tha

damak uTha tha wo chehra haya ki chadar mein

ki jaise jurm-e-wafa us ka muddaa hi na tha

hamare hath faqat ret ke sadaf aae

ki sahilon pe sitara koi raha hi na tha