aasman ka na raha aur zamin ka na raha

āsmāñ kā na rahā aur zamīñ kā na rahā

ġham kī jo shāḳh se TuuTā vo kahīñ kā na rahā

itne be-rañg ujāloñ se nazar guzrī hai

hausla aañkh ko ab ḳhvāb-e-hasīñ kā na rahā

vaqt ne saare bharosoñ ke shajar kaaT diye

ab to saaya bhī koī ḳhāk-nashīñ kā na rahā

kaun ab us ko ujaḌne se bachā saktā hai

haa.e vo ghar ki jo apne hī makīñ kā na rahā

ai 'nazīr' apnī sharāfat hai isī kī qaa.il

haañ kā pāband huā jab tū ''nahīñ'' kā na rahā

aasman ka na raha aur zamin ka na raha

gham ki jo shaKH se TuTa wo kahin ka na raha

itne be-rang ujalon se nazar guzri hai

hausla aankh ko ab KHwab-e-hasin ka na raha

waqt ne sare bharoson ke shajar kaT diye

ab to saya bhi koi KHak-nashin ka na raha

kaun ab us ko ujaDne se bacha sakta hai

hae wo ghar ki jo apne hi makin ka na raha

ai 'nazir' apni sharafat hai isi ki qail

han ka paband hua jab tu nahin ka na raha