aali jis ka fann-e-suKHan mein ek andaz nirala tha

'ālī' jis kā fann-e-suḳhan meñ ik andāz nirālā thā

naqd-e-suḳhan meñ zikr ye aayā dohe paḌhne vaalā thā

jaane kyuuñ logoñ kī nazreñ tujh tak pahuñcheñ ham ne to

barsoñ ba.ad ġhazal kī rau meñ ik mazmūn nikālā thā

kyā vo ghaTā tire ghar se uTThī kyā vo tū ne bhejī thī

būñdeñ raushan raushan thiiñ aur bādal kaalā kaalā thā

ajnabiyoñ se dhoke khānā phir bhī samajh meñ aatā hai

is ke liye kyā kahte ho vo shaḳhs to dekhā-bhālā thā

ham na mile aur jab bhī mile to donoñ ne iqrār kiyā

haañ vo va.ada aisā thā jo puurā hone vaalā thā

taptī dhūpoñ meñ bhī aa kar apnī yaad dilāte haiñ

chāñd-nagar ke 'inshā'-sāhib aale jin kā haalā thā

'ali' jis ka fann-e-suKHan mein ek andaz nirala tha

naqd-e-suKHan mein zikr ye aaya dohe paDhne wala tha

jaane kyun logon ki nazren tujh tak pahunchen hum ne to

barson baad ghazal ki rau mein ek mazmun nikala tha

kya wo ghaTa tere ghar se uTThi kya wo tu ne bheji thi

bunden raushan raushan thin aur baadal kala kala tha

ajnabiyon se dhoke khana phir bhi samajh mein aata hai

is ke liye kya kahte ho wo shaKHs to dekha-bhaala tha

hum na mile aur jab bhi mile to donon ne iqrar kiya

han wo wada aisa tha jo pura hone wala tha

tapti dhupon mein bhi aa kar apni yaad dilate hain

chand-nagar ke 'insha'-sahib aale jin ka haala tha