anjaan rahen

kahāñ ko le ke jaatī haiñ hameñ anjān rāheñ ye

patā manzil kā detī haiñ yā pīchhe chhoḌ jaatī haiñ

hamārī ārzūoñ kā ye māthā phoḌ jaatī haiñ

inhī anjān rāhoñ meñ kisī anjān chehre kī

nigāhoñ se nigāheñ chaar mil ke ho bhī jaatī haiñ

magar in ke bhī milne se kahāñ khultī haiñ ye rāheñ

hamārī zindagānī bhī to ik anjān rasta hai

ḳhabar ham ko nahīñ hotī kisī bhī moḌ kī phir bhī

bas ik mauhūm sī ummīd par ham chal to paḌte haiñ

ki shāyad koī mil jaa.e nazar jis se milā leñ ham

kuchh apnī baat keh leñ ham kuchh us ke bhed pā leñ ham

magar anjān rāhoñ par kisī anjān se mil kar

sulajhtī kab haiñ ye girheñ hamārī zindagānī kī

kahan ko le ke jati hain hamein anjaan rahen ye

pata manzil ka deti hain ya pichhe chhoD jati hain

hamari aarzuon ka ye matha phoD jati hain

inhi anjaan rahon mein kisi anjaan chehre ki

nigahon se nigahen chaar mil ke ho bhi jati hain

magar in ke bhi milne se kahan khulti hain ye rahen

hamari zindagani bhi to ek anjaan rasta hai

KHabar hum ko nahin hoti kisi bhi moD ki phir bhi

bas ek mauhum si ummid par hum chal to paDte hain

ki shayad koi mil jae nazar jis se mila len hum

kuchh apni baat keh len hum kuchh us ke bhed pa len hum

magar anjaan rahon par kisi anjaan se mil kar

sulajhti kab hain ye girhen hamari zindagani ki