jhuT

maiñ ne bachpan meñ sunā thā ki isī duniyā meñ

jis meñ ham rahte haiñ pariyoñ ke tilismāt bhī haiñ

jin ke baare meñ buzurgoñ kī rivāyāt bhī haiñ

aisī pariyāñ ki jo rātoñ meñ safar kartī haiñ

chāñd meñ phirtī haiñ ḳhush-bū meñ basar kartī haiñ

un ko mil jaa.e jo darmāñda musāfir koī

us ko phir apne paristān meñ le jaatī haiñ

resham-o-atlas-o-kam-ḳhvāb use pahnātī haiñ

us kī dil-jūī ke sāmān baham kartī haiñ

mehrbāñ hotī haiñ dildārī-e-ġham kartī haiñ

maiñ baḌe shauq se bachpan meñ sunā kartā thā

be-sadaf raah meñ motī bhī paḌe milte haiñ

ret kī tah meñ javāhar bhī dabe milte haiñ

unhī galiyoñ meñ vo poshīda zaḳhīre bhī haiñ

jin meñ nīlam bhī haiñ yāqūt bhī hiire bhī haiñ

jin ko har shaḳhs uThā saktā hai pā saktā hai

apnī rātoñ ko charāġhāñ bhī banā saktā hai

ye rivāyat bhī sunī thī ki koī mard-e-ḳhudā

rāh-gum-karda musāfir ko pareshāñ pā kar

ġhaib se ‘uqda-kushā.ī ke liye aatā hai

maiñ baḌā ho ke jab us shahr-e-fusūñ-gar meñ chalā

maiñ ne chāhā ki mujhe raah meñ pariyāñ mil jaa.eñ

ik paristān meñ taqdīr kī kaliyāñ khil jaa.eñ

kisī sūrat mirī dil-jūī kā sāmāñ ho jaa.e

mere zaḳhmoñ kā mudāvā kisī 'unvāñ ho jaa.e

mujh ko pariyāñ to kujā shahr meñ saayā na milā

maiñ ne chāhā mujhe poshīda zaḳhīre mil jaa.eñ

vahī nīlam vahī motī vahī hiire mil jaa.eñ

ḳhair vo nīlam-o-pukhrāj to kyā mil sakte

koī patthar na milā jis se maiñ sar phoḌ sakūñ

'umr bhar dasht-o-bayābāñ meñ bhaTaktā hī phirā

aur phir chāhā ki dukh apne kisī se keh luuñ

raah meñ koī bhī allāh kā banda na milā

main ne bachpan mein suna tha ki isi duniya mein

jis mein hum rahte hain pariyon ke tilismat bhi hain

jin ke bare mein buzurgon ki riwayat bhi hain

aisi pariyan ki jo raaton mein safar karti hain

chand mein phirti hain KHush-bu mein basar karti hain

un ko mil jae jo darmanda musafir koi

us ko phir apne paristan mein le jati hain

resham-o-atlas-o-kam-KHwab use pahnati hain

us ki dil-jui ke saman baham karti hain

mehrban hoti hain dildari-e-gham karti hain

main baDe shauq se bachpan mein suna karta tha

be-sadaf rah mein moti bhi paDe milte hain

ret ki tah mein jawahar bhi dabe milte hain

unhi galiyon mein wo poshida zaKHire bhi hain

jin mein nilam bhi hain yaqut bhi hire bhi hain

jin ko har shaKHs uTha sakta hai pa sakta hai

apni raaton ko charaghan bhi bana sakta hai

ye riwayat bhi suni thi ki koi mard-e-KHuda

rah-gum-karda musafir ko pareshan pa kar

ghaib se ‘uqda-kushai ke liye aata hai

main baDa ho ke jab us shahr-e-fusun-gar mein chala

main ne chaha ki mujhe rah mein pariyan mil jaen

ek paristan mein taqdir ki kaliyan khil jaen

kisi surat meri dil-jui ka saman ho jae

mere zaKHmon ka mudawa kisi 'unwan ho jae

mujh ko pariyan to kuja shahr mein saya na mila

main ne chaha mujhe poshida zaKHire mil jaen

wahi nilam wahi moti wahi hire mil jaen

KHair wo nilam-o-pukhraj to kya mil sakte

koi patthar na mila jis se main sar phoD sakun

'umr bhar dasht-o-bayaban mein bhaTakta hi phira

aur phir chaha ki dukh apne kisi se keh lun

rah mein koi bhi allah ka banda na mila