iblis ka etiraf

tū ne jis vaqt ye insān banāyā yā-rab

us ghaḌī mujh ko to ik aañkh na bhāyā yā-rab

is liye maiñ ne sar apnā na jhukāyā yā-rab

lekin ab palTī hai kuchh aisī hī kaayā yā-rab

aql-mandī hai isī meñ ki maiñ tauba kar luuñ

sochtā huuñ ki ab insān ko sajda kar luuñ

ibtidā.an thī baḌī narm tabī'at is kī

qalb-o-jāñ paak the shaffāf thī tīnat is kī

phir ba-tadrīj badalne lagī ḳhaslat is kī

ab to ḳhud mujh pe musallat hai sharārat is kī

is se pahle ki maiñ apnā hī tamāshā kar luuñ

sochtā huuñ ki ab insān ko sajda kar luuñ

bhar diyā tū ne bhalā kaun sā fitna is meñ

paktā rahtā hai hamesha koī laavā is meñ

ek ik saañs hai ab sūrat-e-sho.ala is meñ

aag maujūd thī kyā mujh se ziyāda is meñ

apnā ātish-kada-e-zāt hī ThanDā kar luuñ

sochtā huuñ ki ab insān ko sajda kar luuñ

ab to ye ḳhuuñ ke bhī rishtoñ se akaḌ jaatā hai

baap se bhaa.ī se beTe se bhī laḌ jaatā hai

jab kabhī taish meñ hatthe se ukhaḌ jaatā hai

ḳhud mire shar kā tavāzun bhī bigaḌ jaatā hai

ab to lāzim hai ki maiñ ḳhud ko hī sīdhā kar luuñ

sochtā huuñ ki ab insān ko sajda kar luuñ

merī nazroñ meñ to bas miTTī kā mādhav thā bashar

maiñ samajhtā thā ise ḳhud se bahut hī kamtar

mujh pe pahle na khule is ke siyāsī jauhar

kaan mere bhī katartā hai ye leader ban kar

shaitanat chhoḌ ke maiñ bhī yahī dhandā kar luuñ

sochtā huuñ ki ab insān ko sajda kar luuñ

ab jhijhaktā hai na Dartā hai na sharmātā hai

nit na.ī fitna-garī roz ye dikhlātā hai

ab ye zālim mere bahkāve meñ kab aatā hai

maiñ burā sochtā rahtā huuñ ye kar jaatā hai

kyā abhī is kī murīdī kā irāda kar luuñ

sochtā huuñ ki ab insān ko sajda kar luuñ

ab jagah koī nahīñ mere liye dhartī par

mere shar se bhī sivā hai yahāñ insān kā shar

ab to lagtā hai yahī faisla mujh ko behtar

is se pahle ki pahuñch jaa.e yaañ superpower

maiñ kisī aur hī sayyāre pe qabza kar luuñ

sochtā huuñ ki ab insān ko sajda kar luuñ

zulm ke daam bichhā.e haiñ nirāle is ne

nit na.e pech 'aqā.ed meñ bhī Daale is ne

kar diye qaid añdheroñ meñ ujāle is ne

kaam jitne the mire saare sañbhāle is ne

ab to ḳhud ko maiñ har ik bojh se halkā kar luuñ

sochtā huuñ ki ab insān ko sajda kar luuñ

istaqāmat thī kabhī is kī musībat mujh ko

apne Dhab par ise laanā thā qayāmat mujh ko

karnī paḌtī thī bahut is pe mashaqqat mujh ko

ab ye 'ālam hai ki din-rāt hai fursat mujh ko

ab kahīñ gosha-nashīnī meñ guzāra kar luuñ

sochtā huuñ ki ab insān ko sajda kar luuñ

mast thā maiñ tere insāñ kī hiqārat kar ke

ḳhud pe nāzāñ thā bahut tujh se baġhāvat kar ke

kyā milā mujh ko magar aisī himāqat kar ke

ab yahī kahtā huuñ maiñ ḳhud pe malāmat kar ke

kyā ye mumkin hai ki phir terī itā'at kar luuñ

sochtā huuñ ki ab insān ko sajda kar luuñ

tu ne jis waqt ye insan banaya ya-rab

us ghaDi mujh ko to ek aankh na bhaya ya-rab

is liye main ne sar apna na jhukaya ya-rab

lekin ab palTi hai kuchh aisi hi kaya ya-rab

aql-mandi hai isi mein ki main tauba kar lun

sochta hun ki ab insan ko sajda kar lun

ibtidaan thi baDi narm tabi'at is ki

qalb-o-jaan pak the shaffaf thi tinat is ki

phir ba-tadrij badalne lagi KHaslat is ki

ab to KHud mujh pe musallat hai shararat is ki

is se pahle ki main apna hi tamasha kar lun

sochta hun ki ab insan ko sajda kar lun

bhar diya tu ne bhala kaun sa fitna is mein

pakta rahta hai hamesha koi lawa is mein

ek ek sans hai ab surat-e-shoala is mein

aag maujud thi kya mujh se ziyaada is mein

apna aatish-kada-e-zat hi ThanDa kar lun

sochta hun ki ab insan ko sajda kar lun

ab to ye KHun ke bhi rishton se akaD jata hai

bap se bhai se beTe se bhi laD jata hai

jab kabhi taish mein hatthe se ukhaD jata hai

KHud mere shar ka tawazun bhi bigaD jata hai

ab to lazim hai ki main KHud ko hi sidha kar lun

sochta hun ki ab insan ko sajda kar lun

meri nazron mein to bas miTTi ka madhaw tha bashar

main samajhta tha ise KHud se bahut hi kamtar

mujh pe pahle na khule is ke siyasi jauhar

kan mere bhi katarta hai ye leader ban kar

shaitanat chhoD ke main bhi yahi dhanda kar lun

sochta hun ki ab insan ko sajda kar lun

ab jhijhakta hai na Darta hai na sharmata hai

nit nai fitna-gari roz ye dikhlata hai

ab ye zalim mere bahkawe mein kab aata hai

main bura sochta rahta hun ye kar jata hai

kya abhi is ki muridi ka irada kar lun

sochta hun ki ab insan ko sajda kar lun

ab jagah koi nahin mere liye dharti par

mere shar se bhi siwa hai yahan insan ka shar

ab to lagta hai yahi faisla mujh ko behtar

is se pahle ki pahunch jae yan superpower

main kisi aur hi sayyare pe qabza kar lun

sochta hun ki ab insan ko sajda kar lun

zulm ke dam bichhae hain nirale is ne

nit nae pech 'aqaed mein bhi Dale is ne

kar diye qaid andheron mein ujale is ne

kaam jitne the mere sare sanbhaale is ne

ab to KHud ko main har ek bojh se halka kar lun

sochta hun ki ab insan ko sajda kar lun

istaqamat thi kabhi is ki musibat mujh ko

apne Dhab par ise lana tha qayamat mujh ko

karni paDti thi bahut is pe mashaqqat mujh ko

ab ye 'alam hai ki din-raat hai fursat mujh ko

ab kahin gosha-nashini mein guzara kar lun

sochta hun ki ab insan ko sajda kar lun

mast tha main tere insan ki hiqarat kar ke

KHud pe nazan tha bahut tujh se baghawat kar ke

kya mila mujh ko magar aisi himaqat kar ke

ab yahi kahta hun main KHud pe malamat kar ke

kya ye mumkin hai ki phir teri ita'at kar lun

sochta hun ki ab insan ko sajda kar lun