bint-e-himala

aah! gañgā ye hasīñ paikar-e-billor tirā

terī har mauj-e-ravāñ jalva-e-maġhrūr tirā

jaur-e-maġhrib se magar dil hai bahut chuur tirā

jhāñktā hai tire girdāb se nāsūr tirā

zulm Dhaa.e haiñ safīnoñ ne sitamgāroñ ke

zaḳhm ab tak tire siine pe haiñ patvāroñ ke

mahv rahte the sitāre tirī mai piine meñ

chāñd muñh dekhtā thā tere hī ā.īne meñ

ḳhalvat-e-mahr daraḳhshāñ thī tire siine meñ

terī tābāniyāñ aatī na thiiñ taḳhmīne meñ

aaj rotī hai magar terī javānī tujh ko

khā gayā aa ke yahāñ 'thames' kā paanī tujh ko

aah ai koh-e-himāla ke ġhurūr-e-sayyāl

tere dāman pe kabhī baiThī na thī gard-e-malāl

muñh tirā poñchhtā thā chāñd kā sīmīñ rūmāl

zaḳhm siine pe liye aaj haiñ dhāre tere

uf kahāñ Duub ga.e chāñd sitāre tere

reg-e-dozaḳh ko chhupā.e hai qabā ke andar

haul-nāk aaj hai kitnā ye dahaktā manzar

shaam hī shaam nazar aatī hai kyuuñ sāhil par?

kyuuñ tirī maujoñ se chhante nahīñ anvār-e-sahar?

raushnī kyuuñ huī jaatī hai gurezāñ tujh se

kyuuñ añdheroñ ke haiñ lipTe hue tūfāñ tujh se

aaj sāhil pe nazar aatī hai jaltī huī aag

ādamiyyat kā sulagtā hai havāoñ meñ suhāg

aaj hai sāz-e-siyāsat kā bhayānak sā raag

phan uThā.e hue bal khāte haiñ sho.aloñ ke naag

aaj insān ko Dastī haiñ havā.eñ terī

zahr se kitnī haiñ labrez fazā.eñ terī

aa.ī hai thames se ik mauj-e-ravāñ gaatī huī

tujh ko āzādī ke paiġhām se bahlātī huī

ruuh mai-ḳhāna liye shauq ko bahkātī huī

naaz kartī huī hañstī huī iThlātī huī

laakh uljhā kareñ zulfoñ meñ ulajhne vaale

is ke ishvoñ ko samajhte haiñ samajhne vaale

lekin ai bint-e-himāla tirī azmat kī qasam

sail ke sāñche meñ Dhālī huī rif.at kī qasam

tere jalvoñ kī qasam, terī latāfat kī qasam

terī maujoñ se ubhartī huī himmat kī qasam

ab tirī āñkhoñ ko namnāk na hone deñge

dāman-e-nāz tirā chaak na hone deñge

aah! ganga ye hasin paikar-e-billor tera

teri har mauj-e-rawan jalwa-e-maghrur tera

jaur-e-maghrib se magar dil hai bahut chur tera

jhankta hai tere girdab se nasur tera

zulm Dhae hain safinon ne sitamgaron ke

zaKHm ab tak tere sine pe hain patwaron ke

mahw rahte the sitare teri mai pine mein

chand munh dekhta tha tere hi aaine mein

KHalwat-e-mahr daraKHshan thi tere sine mein

teri tabaniyan aati na thin taKHmine mein

aaj roti hai magar teri jawani tujh ko

kha gaya aa ke yahan 'thames' ka pani tujh ko

aah ai koh-e-himala ke ghurur-e-sayyal

tere daman pe kabhi baiThi na thi gard-e-malal

munh tera ponchhta tha chand ka simin rumal

zaKHm sine pe liye aaj hain dhaare tere

uf kahan Dub gae chand sitare tere

reg-e-dozaKH ko chhupae hai qaba ke andar

haul-nak aaj hai kitna ye dahakta manzar

sham hi sham nazar aati hai kyun sahil par?

kyun teri maujon se chhante nahin anwar-e-sahar?

raushni kyun hui jati hai gurezan tujh se

kyun andheron ke hain lipTe hue tufan tujh se

aaj sahil pe nazar aati hai jalti hui aag

aadamiyyat ka sulagta hai hawaon mein suhag

aaj hai saz-e-siyasat ka bhayanak sa rag

phan uThae hue bal khate hain shoalon ke nag

aaj insan ko Dasti hain hawaen teri

zahr se kitni hain labrez fazaen teri

aai hai thames se ek mauj-e-rawan gati hui

tujh ko aazadi ke paigham se bahlati hui

ruh mai-KHana liye shauq ko bahkati hui

naz karti hui hansti hui iThlati hui

lakh uljha karen zulfon mein ulajhne wale

is ke ishwon ko samajhte hain samajhne wale

lekin ai bint-e-himala teri azmat ki qasam

sail ke sanche mein Dhaali hui rifat ki qasam

tere jalwon ki qasam, teri latafat ki qasam

teri maujon se ubharti hui himmat ki qasam

ab teri aankhon ko namnak na hone denge

daman-e-naz tera chaak na hone denge