subh-e-id

rang-e-chaman banā hai garebān-e-sub.h-e-īd

dāmān-e-gul se kam nahīñ dāmān-e-sub.h-e-īd

kyā shai hai kyā kahūñ ruḳh-e-ḳhandān-e-sub.h-e-īd

goyā bahār par hai gulistān-e-sub.h-e-īd

bhūlā na rāt-bhar mujhe 'ālam hilāl kā

us kā zuhūr shaam thā e'lān-e-sub.h-e-īd

dushman hoñ yā ki dost gale aaj sab mileñ

jaarī huā ye dahr meñ farmān sub.h-e-īd

kaaTī hai intizār meñ maiñ ne tamām raat

pesh-e-nazar thā shaam se sāmān-e-sub.h-e-īd

har shai se kyoñ na rahmat-e-haq kā zuhūr ho

ye shān-e-sub.h-e-īd ye sāmān-e-sub.h-e-īd

hāsil huā hai aaj mujhe imbisāt-e-rūh

sau jaan se hai dil mirā qurbān-e-sub.h-e-īd

sar ḳhud-baḳhud jhukā mirā sajde ke vāste

vallāh mere sar hai ye ehsān-e-sub.h-e-īd

tār-e-shuā-e-mehr haiñ satreñ bayāz kī

surḳhī shafaq kī saaf hai 'unvān-e-sub.h-e-īd

baḳhshish ḳhudā kī aaj hai har roza-dār par

mā'mūr ne'matoñ se huā ḳhvān-e-sub.h-e-īd

kyā dil-fareb is kī haiñ rangīñ-adā.iyāñ

phūloñ se hai bharā huā dāmān-e-sub.h-e-īd

haañ lūTnā hai aaj ise daulat-e-visāl

'bāsit' hai kis adā se sanā-ḳhvān-e-sub.h-e-īd

rang-e-chaman bana hai gareban-e-subh-e-id

daman-e-gul se kam nahin daman-e-subh-e-id

kya shai hai kya kahun ruKH-e-KHandan-e-subh-e-id

goya bahaar par hai gulistan-e-subh-e-id

bhula na raat-bhar mujhe 'alam hilal ka

us ka zuhur sham tha e'lan-e-subh-e-id

dushman hon ya ki dost gale aaj sab milen

jari hua ye dahr mein farman subh-e-id

kaTi hai intizar mein main ne tamam raat

pesh-e-nazar tha sham se saman-e-subh-e-id

har shai se kyon na rahmat-e-haq ka zuhur ho

ye shan-e-subh-e-id ye saman-e-subh-e-id

hasil hua hai aaj mujhe imbisat-e-ruh

sau jaan se hai dil mera qurban-e-subh-e-id

sar KHud-baKHud jhuka mera sajde ke waste

wallah mere sar hai ye ehsan-e-subh-e-id

tar-e-shua-e-mehr hain satren bayaz ki

surKHi shafaq ki saf hai 'unwan-e-subh-e-id

baKHshish KHuda ki aaj hai har roza-dar par

ma'mur ne'maton se hua KHwan-e-subh-e-id

kya dil-fareb is ki hain rangin-adaiyan

phulon se hai bhara hua daman-e-subh-e-id

han luTna hai aaj ise daulat-e-visal

'basit' hai kis ada se sana-KHwan-e-subh-e-id