bint-e-hawwa

bint-e-havvā huuñ maiñ 'aurat hai mirā ism-e-sharīf

hai ye pahchān mirī aur yahī hai tā'rīf

mujh ko hai faḳhr ki us qaum se nisbat hai mirī

fātima mariyam-o-sītā sī haiñ rahbar jis kī

maiñ bhī ashraf huuñ nigāhoñ meñ ḳhudā kī mere

merī to god meñ khele haiñ masīhā kitne

kitne valiyoñ ne mire haath kī roTī khaa.ī

kitne shāhoñ ne mire paañv meñ jannat paa.ī

maiñ hī patthar ke makānoñ ko banātī ghar huuñ

maiñ hī duniyā-e-mohabbat kā hasīñ mehvar huuñ

mere ausāf gināne ko ye kāġhaz kam haiñ

sinf-e-nāzuk huuñ magar ruuh mirī rustam hai

maiñ ne jazboñ kā tasadduq va bharam rakkhā hai

merī hī zaat se mansūb har ik rishta hai

maañ bahan huuñ kabhī biivī to kabhī beTī huuñ

koī kirdār ho mardoñ se vafā kartī huuñ

haañ magar shart-e-vafā ye hai ki pā.ūñ bhī vafā

maiñ bhī insān huuñ kamtar nahīñ rutba merā

aur rishtoñ se alag bhī hai mirī ik hastī

jo faqat ghar meñ hī mahdūd nahīñ rah saktī

ġhuncha-o-gul se bhī kab chāhiye tashbīh mujhe

husn-e-sīrat se mire dījiye tarjīh mujhe

merī zulfoñ mire kājal kī na bāteñ kariye

kuchh mire zauq-o-zehānat ko bhī achchhā kahiye

haisiyat ho nahīñ saktī nazar-andāz mirī

rok saktā nahīñ ab koī bhī parvāz mirī

āsmāñ kyā hai ḳhalā tak hai rasā.ī merī

'azm de saktā hai ḳhud baḌh ke gavāhī merī

indarā huuñ maiñ teresā huuñ malāla huuñ maiñ

jis ne duniyā ko jhukāyā vo irāda huuñ maiñ

merā hargiz nahīñ kahnā mujhe bartar samjheñ

mard hazrāt mujhe sirf barābar samjheñ

maiñ chalūñ shāna-ba-shāna to burā mat māneñ

merī hurmat merī 'azmat ko zarā pahchāneñ

bint-e-havvā huuñ 'hinā' baat baḌī hai merī

naam 'aurat hai mirā zaat baḌī hai merī

bint-e-hawwa hun main 'aurat hai mera ism-e-sharif

hai ye pahchan meri aur yahi hai ta'rif

mujh ko hai faKHr ki us qaum se nisbat hai meri

fatima mariyam-o-sita si hain rahbar jis ki

main bhi ashraf hun nigahon mein KHuda ki mere

meri to god mein khele hain masiha kitne

kitne waliyon ne mere hath ki roTi khai

kitne shahon ne mere panw mein jannat pai

main hi patthar ke makanon ko banati ghar hun

main hi duniya-e-mohabbat ka hasin mehwar hun

mere ausaf ginane ko ye kaghaz kam hain

sinf-e-nazuk hun magar ruh meri rustam hai

main ne jazbon ka tasadduq wa bharam rakkha hai

meri hi zat se mansub har ek rishta hai

man bahan hun kabhi biwi to kabhi beTi hun

koi kirdar ho mardon se wafa karti hun

han magar shart-e-wafa ye hai ki paun bhi wafa

main bhi insan hun kamtar nahin rutba mera

aur rishton se alag bhi hai meri ek hasti

jo faqat ghar mein hi mahdud nahin rah sakti

ghuncha-o-gul se bhi kab chahiye tashbih mujhe

husn-e-sirat se mere dijiye tarjih mujhe

meri zulfon mere kajal ki na baaten kariye

kuchh mere zauq-o-zehanat ko bhi achchha kahiye

haisiyat ho nahin sakti nazar-andaz meri

rok sakta nahin ab koi bhi parwaz meri

aasman kya hai KHala tak hai rasai meri

'azm de sakta hai KHud baDh ke gawahi meri

indara hun main teresa hun malala hun main

jis ne duniya ko jhukaya wo irada hun main

mera hargiz nahin kahna mujhe bartar samjhen

mard hazraat mujhe sirf barabar samjhen

main chalun shana-ba-shana to bura mat manen

meri hurmat meri 'azmat ko zara pahchanen

bint-e-hawwa hun 'hina' baat baDi hai meri

nam 'aurat hai mera zat baDi hai meri