shorida-sari nauhagari koh-kani hai

shorīda-sarī nauhagarī koh-kanī hai

ye dil kī lagī dil kī lagī dil kī lagī hai

aise na sulagte hue sho'loñ ko havā de

chilman se koī aañkh mujhe dekh rahī hai

āñkhoñ meñ abhī bhī haiñ ka.ī ḳhvāb adhūre

yādoñ kī koī lahr bhī ashkoñ meñ Dhalī hai

is dil ke añdhere meñ ugegā nahīñ sūraj

ummīd kā har diip har ik sham' bujhī hai

kyā rang dikhā.egī mujhe gardish-e-daurāñ

fariyād-o-fuġhāñ aah meñ bhī be-asarī hai

bāhar se lage zaat mirī shahr-e-ḳhamoshāñ

andar se mirī ruuh magar chīḳh uThī hai

insāñ hai yahāñ aaj bhī insān kā dushman

tum ne to kahā thā ye mohabbat kī sadī hai

ai kaash ki hotā maiñ muqaddar kā sikandar

par paañv meñ taqdīr kī zanjīr paḌī hai

saffāk-o-sitam-gar tujhe kahtā hai zamāna

aisī na koī baat mire dil ne sunī hai

mumkin hī nahīñ bād-e-sabā itnī ho dil-kash

ye ġhair kī mahfil meñ tirī baat chalī hai

pūchhā ki hai kaise gul-o-gulzār mo'attar

phūloñ ne kahā hai ki koī zulf khulī hai

marne pe mire aise na tum ashk bahāo

chehre se 'ayāñ hai ki tumheñ kitnī ḳhushī hai

aayā na tujhe she'r meñ lafzoñ ko pironā

kyā is se baḌī aur koī be-hunarī hai

ilhām ke mānind lagā she'r ye merā

jab dard kī chādar mire lafzoñ ne bunī hai

chheḌā hai 'ra.īs' us ne jo maazī kā fasāna

siine meñ javānī kī vahī aag jalī hai

shorida-sari nauhagari koh-kani hai

ye dil ki lagi dil ki lagi dil ki lagi hai

aise na sulagte hue sho'lon ko hawa de

chilman se koi aankh mujhe dekh rahi hai

aankhon mein abhi bhi hain kai KHwab adhure

yaadon ki koi lahr bhi ashkon mein Dhali hai

is dil ke andhere mein ugega nahin suraj

ummid ka har dip har ek sham' bujhi hai

kya rang dikhaegi mujhe gardish-e-dauran

fariyaad-o-fughan aah mein bhi be-asari hai

bahar se lage zat meri shahr-e-KHamoshan

andar se meri ruh magar chiKH uThi hai

insan hai yahan aaj bhi insan ka dushman

tum ne to kaha tha ye mohabbat ki sadi hai

ai kash ki hota main muqaddar ka sikandar

par panw mein taqdir ki zanjir paDi hai

saffak-o-sitam-gar tujhe kahta hai zamana

aisi na koi baat mere dil ne suni hai

mumkin hi nahin baad-e-saba itni ho dil-kash

ye ghair ki mahfil mein teri baat chali hai

puchha ki hai kaise gul-o-gulzar mo'attar

phulon ne kaha hai ki koi zulf khuli hai

marne pe mere aise na tum ashk bahao

chehre se 'ayan hai ki tumhein kitni KHushi hai

aaya na tujhe she'r mein lafzon ko pirona

kya is se baDi aur koi be-hunari hai

ilham ke manind laga she'r ye mera

jab dard ki chadar mere lafzon ne buni hai

chheDa hai 'rais' us ne jo mazi ka fasana

sine mein jawani ki wahi aag jali hai