ye bhi to kamal ho gaya hai

ye bhī to kamāl ho gayā hai

zāhir vo jamāl ho gayā hai

jis kaam meñ ham ne haath Daalā

vo kaam muhāl ho gayā hai

guzrī huī umar kā har ik pal

minnat-kash-e-hāl ho gayā hai

dil kaun sā tāza-dam thā pahle

ab aur niDhāl ho gayā hai

kuchh roz jo din phire haiñ apne

vo shāmil-e-hāl ho gayā hai

jo ḳhvāb se ḳhuun se kamāyā

vo muft kā maal ho gayā hai

ye dekh ki tere sāmne kaun

sar-tā-pā savāl ho gayā hai

ai ḳhauf-e-zavāl tere hāthoñ

sab rū-ba-zavāl ho gayā hai

ye bhi to kamal ho gaya hai

zahir wo jamal ho gaya hai

jis kaam mein hum ne hath Dala

wo kaam muhaal ho gaya hai

guzri hui umar ka har ek pal

minnat-kash-e-haal ho gaya hai

dil kaun sa taza-dam tha pahle

ab aur niDhaal ho gaya hai

kuchh roz jo din phire hain apne

wo shamil-e-haal ho gaya hai

jo KHwab se KHun se kamaya

wo muft ka mal ho gaya hai

ye dekh ki tere samne kaun

sar-ta-pa sawal ho gaya hai

ai KHauf-e-zawal tere hathon

sab ru-ba-zawal ho gaya hai