jo khaya dhoke pe dhoka to aankh bhar aai

jo khāyā dhoke pe dhokā to aañkh bhar aa.ī

samajh meñ aa.ī ye duniyā to aañkh bhar aa.ī

vo phir rahā thā laboñ par hañsī sajā.e hue

use qarīb se dekhā to aañkh bhar aa.ī

maiñ us se haath milāyā thā muskurāte hue

vo rail-gāḌī meñ baiThā to aañkh bhar aa.ī

vafā kī raah meñ itne fareb khaa.e haiñ

kisī ne haal jo pūchhā to aañkh bhar aa.ī

vo ek abr kā TukḌā jo jhuum kar uTThā

dayār-e-ġhair meñ barsā to aañkh bhar aa.ī

mujhe vo dekh ke apnī nazar bachā.e hue

mire qarīb se guzrā to aañkh bhar aa.ī

bahār aane ko aa.ī chaman meñ ai 'muztar'

khilā na phuul jo dil kā to aañkh bhar aa.ī

jo khaya dhoke pe dhoka to aankh bhar aai

samajh mein aai ye duniya to aankh bhar aai

wo phir raha tha labon par hansi sajae hue

use qarib se dekha to aankh bhar aai

main us se hath milaya tha muskuraate hue

wo rail-gaDi mein baiTha to aankh bhar aai

wafa ki rah mein itne fareb khae hain

kisi ne haal jo puchha to aankh bhar aai

wo ek abr ka TukDa jo jhum kar uTTha

dayar-e-ghair mein barsa to aankh bhar aai

mujhe wo dekh ke apni nazar bachae hue

mere qarib se guzra to aankh bhar aai

bahaar aane ko aai chaman mein ai 'muztar'

khila na phul jo dil ka to aankh bhar aai