tan mein dam rok main ba der rakha

tan meñ dam rok maiñ ba der rakhā

aao jī kis ne tum ko gher rakhā

ham ga.e vaañ to yaañ vo aayā vaah

ḳhuub qismat ne her-pher rakhā

kar gayā vo hī rāh-e-ishq ko tai

yaañ qadam jis ne ho diler rakhā

sab ko aajiz kiyā falak ne par ek

āhū-e-dil pe ġham ko sher rakhā

jā ke baiThe jo kū-e-yār meñ ham

vaañ se bāhar qadam na pher rakhā

ba.ad muddat vo dekh kar bolā

kis ne yaañ ḳhaak kā ye Dher rakhā

shukr ai dard-e-ishq tū ne sadā

zindagānī se ham ko ser rakhā

kaisā ghabrā gayā vo kal ham ne

Tuk jo raste meñ us ko gher rakhā

ḳhair ho yā ilāhī 'jur.at' ne

āshiqī meñ qadam ko pher rakhā

tan mein dam rok main ba der rakha

aao ji kis ne tum ko gher rakha

hum gae wan to yan wo aaya wah

KHub qismat ne her-pher rakha

kar gaya wo hi rah-e-ishq ko tai

yan qadam jis ne ho diler rakha

sab ko aajiz kiya falak ne par ek

aahu-e-dil pe gham ko sher rakha

ja ke baiThe jo ku-e-yar mein hum

wan se bahar qadam na pher rakha

baad muddat wo dekh kar bola

kis ne yan KHak ka ye Dher rakha

shukr ai dard-e-ishq tu ne sada

zindagani se hum ko ser rakha

kaisa ghabra gaya wo kal hum ne

Tuk jo raste mein us ko gher rakha

KHair ho ya ilahi 'jurat' ne

aashiqi mein qadam ko pher rakha