dil ko ye tark-e-talluq ki saza di jae

dil ko ye tark-e-ta'alluq kī sazā dī jaa.e

haisiyat is kī nigāhoñ se girā dī jaa.e

dīn-o-īmāñ dil-o-jāñ qīmat-e-yak-jalva kahāñ

'ishq kī raah meñ har chiiz luTā dī jaa.e

kyā paḌī hai koī nafrat se bhī dekhe ham ko

dil dukhā.e to use dil se du'ā dī jaa.e

raat ke saath hī jal uThte haiñ dāġhoñ ke charāġh

sham' bekār jalāte ho bujhā dī jaa.e

maiñ ne ab tark-e-mohabbat kī qasam khaa.ī hai

ye ḳhabar saare hasīnoñ ko sunā dī jaa.e

kuchh badalne se sañvartā nahīñ farsūda samāj

girtī dīvār hai buniyād se Dhā dī jaa.e

zulmat-e-yās jo baḌh jaa.e shab-e-ġham 'tābāñ'

sham'-e-ummīd kī lau aur baḌhā dī jaa.e

dil ko ye tark-e-ta'alluq ki saza di jae

haisiyat is ki nigahon se gira di jae

din-o-iman dil-o-jaan qimat-e-yak-jalwa kahan

'ishq ki rah mein har chiz luTa di jae

kya paDi hai koi nafrat se bhi dekhe hum ko

dil dukhae to use dil se du'a di jae

raat ke sath hi jal uThte hain daghon ke charagh

sham' bekar jalate ho bujha di jae

main ne ab tark-e-mohabbat ki qasam khai hai

ye KHabar sare hasinon ko suna di jae

kuchh badalne se sanwarta nahin farsuda samaj

girti diwar hai buniyaad se Dha di jae

zulmat-e-yas jo baDh jae shab-e-gham 'taban'

sham'-e-ummid ki lau aur baDha di jae