barson talak jahan mein DhunDa nahin mila

barsoñ talak jahān meñ DhūñDā nahīñ milā

koī bhī ham ko aap se achchhā nahīñ milā

chehre to mil gaye the ka.ī dil-nashīñ magar

ruḳhsār pe vo qaaf kā nuqta nahīñ milā

yā to jabīñ nahīñ milī yā zulf rah ga.ī

sāmān mere qatl kā puurā nahīñ milā

ham par chalā.e tiir nigāhoñ ke husn ne

lekin koī nishānchī tum sā nahīñ milā

ik baaġh meñ gaye jahāñ lākhoñ gulāb the

lekin laboñ sā aap ke ġhuncha nahīñ milā

maiñ ġham manā.ūñ aap ke jaane kā kis tarah

maiñ aisā qais huuñ jise sahrā nahīñ milā

maiñ qaid meñ bhī zindagī hañs kar guzārtā

jo mujh ko chāhiye thā vo piñjra nahīñ milā

ham bad-nasīb log haiñ rone ke vāste

chhat par hameñ 'umair sā kamrā nahīñ milā

ġham se 'anas' rihā.ī kā is kā.enāt meñ

ik rāsta hai ḳhud-kushī duujā nahīñ milā

barson talak jahan mein DhunDa nahin mila

koi bhi hum ko aap se achchha nahin mila

chehre to mil gaye the kai dil-nashin magar

ruKHsar pe wo qaf ka nuqta nahin mila

ya to jabin nahin mili ya zulf rah gai

saman mere qatl ka pura nahin mila

hum par chalae tir nigahon ke husn ne

lekin koi nishanchi tum sa nahin mila

ek bagh mein gaye jahan lakhon gulab the

lekin labon sa aap ke ghuncha nahin mila

main gham manaun aap ke jaane ka kis tarah

main aisa qais hun jise sahra nahin mila

main qaid mein bhi zindagi hans kar guzarta

jo mujh ko chahiye tha wo pinjra nahin mila

hum bad-nasib log hain rone ke waste

chhat par hamein 'umair sa kamra nahin mila

gham se 'anas' rihai ka is kaenat mein

ek rasta hai KHud-kushi duja nahin mila