kahan tak ghair jasusi ke lene ko laga aawe

kahāñ tak ġhair jāsūsī ke lene ko lagā aave

ilāhī is balā-e-nā-gahāñ par bhī balā aave

rukā jaatā hai jī andar hī andar aaj garmī se

balā se chaak hī ho jaave siina Tuk havā aave

tirā aanā hī ab markūz hai ham ko dam-e-āḳhir

ye jī sadqe kiyā thā phir na aave tan meñ yā aave

ye rasm-e-āmad-o-raft-e-dayār-e-ishq taaza hai

hañsī vo jaa.e merī aur ronā yuuñ chalā aave

asīrī ne chaman se merī dil-garmī ko dho Daalā

vagarna barq jā kar āshiyāñ merā jalā aave

umīd-e-rahm un se saḳht nā-fahmī hai āshiq kī

ye but sañgīñ-dilī apnī na chhoḌeñ gar ḳhudā aave

ye fann-e-ishq hai aave use tīnat meñ jis kī ho

tū zāhid-e-pīr-e-nā-bāliġh hai be tah tujh ko kyā aave

hamāre dil meñ aane se takalluf ġham ko bejā hai

ye daulat-ḳhāna hai us kā vo jab chāhe chalā aave

ba-rañg-e-bū-e-ġhuncha umr ik hī rañg meñ guzre

mayassar 'mīr'-sāhib gar dil be-mudda.ā aave

kahan tak ghair jasusi ke lene ko laga aawe

ilahi is bala-e-na-gahan par bhi bala aawe

ruka jata hai ji andar hi andar aaj garmi se

bala se chaak hi ho jawe sina Tuk hawa aawe

tera aana hi ab markuz hai hum ko dam-e-aKHir

ye ji sadqe kiya tha phir na aawe tan mein ya aawe

ye rasm-e-amad-o-raft-e-dayar-e-ishq taza hai

hansi wo jae meri aur rona yun chala aawe

asiri ne chaman se meri dil-garmi ko dho Dala

wagarna barq ja kar aashiyan mera jala aawe

umid-e-rahm un se saKHt na-fahmi hai aashiq ki

ye but sangin-dili apni na chhoDen gar KHuda aawe

ye fann-e-ishq hai aawe use tinat mein jis ki ho

tu zahid-e-pir-e-na-baaligh hai be tah tujh ko kya aawe

hamare dil mein aane se takalluf gham ko beja hai

ye daulat-KHana hai us ka wo jab chahe chala aawe

ba-rang-e-bu-e-ghuncha umr ek hi rang mein guzre

mayassar 'mir'-sahib gar dil be-muddaa aawe