tum jo na-kHush na hon to ye puchhun zara mohtaram mushfiqo mehrban dosto

tum jo nā-kHush na hoñ to ye pūchhūñ zarā mohtaram mushfiqo mehrbāñ dosto

jab tumhārī zarūrat rahī hai mujhe tum the aise meñ āḳhir kahāñ dosto

ham kahāñ the kahāñ se kahāñ aa ga.e jā chuke sab kahāñ se kahāñ dosto

manziloñ se pare manzileñ thiiñ bahut kārvāñ the pas-e-kārvāñ dosto

chāñd sūraj se mahrūm shām-o-sahar vaqt hai zulmat-e-shab ke zer-e-asar

koī shai koī manzar numāyāñ nahīñ har taraf hai dhuāñ hī dhuāñ dosto

dil kī mash'al jalā.e hue raat bhar sū-e-manzil rahe gām-zan ham-safar

aur nazdīk-e-manzil qarīb-e-sahar luT gayā shauq kā kārvāñ dosto

raat to raat hai balki roz-e-siyah apnā saaya bhī rahtā hai ham se judā

sub.h-e-‘ishrat jo the dilkash-o-dil-kashāñ shām-e-ġham haiñ vo dāman-kashāñ dosto

kuchh ta.ammul abhī kuchh tahammul abhī kuchh tafakkur abhī kuchh tadabbur abhī

raat kaT jā.egī din nikal aa.egā sub.h ne lī haiñ añgḌā.iyāñ dosto

zindagī nuur bhī zindagī naar bhī zindagī phuul bhī zindagī ḳhaar bhī

har nafas hai na.ī āzmā.ish yahāñ har qadam hai nayā imtihāñ dosto

jalva-e-yār se aañkh pur-nūr hai 'ishq-e-dil-dār se qalb mā'mūr hai

zindagī hai hasīñ zindagī hai javāñ aur hai shauq rūh-e-ravāñ dosto

un kī āvāz hai yā hai lai saaz kī ye hai miinā kī qulqul khanak jaam kī

jaise kānoñ meñ ras gholtā hai koī jaise bajtī haiñ shahnā.iyāñ dosto

dast-e-'tābāñ' meñ vo marmarī haath hai 'ishq kī zindagī husn ke saath hai

yuuñ ubhartī haiñ ā.īna-e-hāl meñ yād-e-māzī kī parchhā.iyāñ dosto

tum jo na-kHush na hon to ye puchhun zara mohtaram mushfiqo mehrban dosto

jab tumhaari zarurat rahi hai mujhe tum the aise mein aaKHir kahan dosto

hum kahan the kahan se kahan aa gae ja chuke sab kahan se kahan dosto

manzilon se pare manzilen thin bahut karwan the pas-e-karwan dosto

chand suraj se mahrum sham-o-sahar waqt hai zulmat-e-shab ke zer-e-asar

koi shai koi manzar numayan nahin har taraf hai dhuan hi dhuan dosto

dil ki mash'al jalae hue raat bhar su-e-manzil rahe gam-zan ham-safar

aur nazdik-e-manzil qarib-e-sahar luT gaya shauq ka karwan dosto

raat to raat hai balki roz-e-siyah apna saya bhi rahta hai hum se juda

subh-e-‘ishrat jo the dilkash-o-dil-kashan sham-e-gham hain wo daman-kashan dosto

kuchh tammul abhi kuchh tahammul abhi kuchh tafakkur abhi kuchh tadabbur abhi

raat kaT jaegi din nikal aaega subh ne li hain angDaiyan dosto

zindagi nur bhi zindagi nar bhi zindagi phul bhi zindagi KHar bhi

har nafas hai nai aazmaish yahan har qadam hai naya imtihan dosto

jalwa-e-yar se aankh pur-nur hai 'ishq-e-dil-dar se qalb ma'mur hai

zindagi hai hasin zindagi hai jawan aur hai shauq ruh-e-rawan dosto

un ki aawaz hai ya hai lai saz ki ye hai mina ki qulqul khanak jam ki

jaise kanon mein ras gholta hai koi jaise bajti hain shahnaiyan dosto

dast-e-'taban' mein wo marmari hath hai 'ishq ki zindagi husn ke sath hai

yun ubharti hain aaina-e-haal mein yaad-e-mazi ki parchhaiyan dosto