kisi ki den hai lekin meri zarurat hai

kisī kī den hai lekin mirī zarūrat hai

junūñ kamāl nahīñ hai kamāl-e-vahshat hai

maiñ zindagī ke sabhī ġham bhulā.e baiThā huuñ

tumhāre ishq se kitnī mujhe sahūlat hai

guzar ga.ī hai magar roz yaad aatī hai

vo ek shaam jise bhūlne kī hasrat hai

zamāne vaale to shāyad nahīñ kisī qābil

jo miltā rahtā huuñ un se mirī muravvat hai

havā bahār kī aa.egī aur maiñ chūmūñgā

vo saare phuul ki jin meñ tirī shabāhat hai

ḳhudā rakhe tirī āñkhoñ kī dil-navāzī ko

tirī nigāh mirī umr bhar kī daulat hai

tire baġhair bujhā jā rahā huuñ andar se

jo Thīk-Thāk huuñ bāhar se to ye aadat hai

jo ho sake to mujhe apne paas rakh lenā

tirā visāl to ik sānvī sa.ādat hai

tire baġhair koī kaise zinda rahtā hai

magar maiñ huuñ ki yahī ishq kī rivāyat hai

kisi ki den hai lekin meri zarurat hai

junun kamal nahin hai kamal-e-wahshat hai

main zindagi ke sabhi gham bhulae baiTha hun

tumhaare ishq se kitni mujhe sahulat hai

guzar gai hai magar roz yaad aati hai

wo ek sham jise bhulne ki hasrat hai

zamane wale to shayad nahin kisi qabil

jo milta rahta hun un se meri murawwat hai

hawa bahaar ki aaegi aur main chumunga

wo sare phul ki jin mein teri shabahat hai

KHuda rakhe teri aankhon ki dil-nawazi ko

teri nigah meri umr bhar ki daulat hai

tere baghair bujha ja raha hun andar se

jo Thik-Thak hun bahar se to ye aadat hai

jo ho sake to mujhe apne pas rakh lena

tera visal to ek sanwi saadat hai

tere baghair koi kaise zinda rahta hai

magar main hun ki yahi ishq ki riwayat hai