karen hijrat to KHak-e-shahr bhi juz-dan mein rakh len

kareñ hijrat to ḳhāk-e-shahr bhī juz-dān meñ rakh leñ

chaleñ ghar se to ghar kyā yaad bhī sāmān meñ rakh leñ

hamārā kyā ki gul ko noch kar takrīm bhī de deñ

sahīfe meñ sajā deñ yā kisī gul-dān meñ rakh leñ

ziyān-e-dil hī is bāzār meñ sūd-e-mohabbat hai

yahāñ hai fā.eda ḳhud ko agar nuqsān meñ rakh leñ

bahut tarsī hai duniyā tere hashr-e-rū-numā.ī ko

batā ab ye talab ham aur kis imkān meñ rakh leñ

hamārā kufr ye hai harf aatā ho jahāñ tujh par

hamīñ to haiñ jo terī aabrū īmān meñ rakh leñ

amaañ kī ek hī sūrat hai ab is be-yaqīnī meñ

parind-e-ġhār! ham bhī jaan terī jaan meñ rakh leñ

Dhale jab tak na shab ham kaaḌh kar ik sham.a kī lau se

tulū-e-sub.h kā manzar na raushan-dān meñ rakh leñ?

karen hijrat to KHak-e-shahr bhi juz-dan mein rakh len

chalen ghar se to ghar kya yaad bhi saman mein rakh len

hamara kya ki gul ko noch kar takrim bhi de den

sahife mein saja den ya kisi gul-dan mein rakh len

ziyan-e-dil hi is bazar mein sud-e-mohabbat hai

yahan hai faeda KHud ko agar nuqsan mein rakh len

bahut tarsi hai duniya tere hashr-e-ru-numai ko

bata ab ye talab hum aur kis imkan mein rakh len

hamara kufr ye hai harf aata ho jahan tujh par

hamin to hain jo teri aabru iman mein rakh len

aman ki ek hi surat hai ab is be-yaqini mein

parind-e-ghaar! hum bhi jaan teri jaan mein rakh len

Dhale jab tak na shab hum kaDh kar ek shama ki lau se

tulu-e-subh ka manzar na raushan-dan mein rakh len?