jab nazar uski aan paDti hai

jab nazar us kī aan paḌtī hai

zindagī tab dhiyān paḌtī hai

jhel lete haiñ āshiq ai farhād

jis ke sar jaisī aan paḌtī hai

hai jafā se ġharaz use itnī

ki vafā imtihān paḌtī hai

nazar un mah-vishāñ kī hai zālim

kyā ġhazab ān-bān paḌtī hai

qadd-e-zāhid nazar meñ chille ba.ad

utrī sī kuchh kamān paḌtī hai

baat is dil ke dard kī yaaro

guftugū meñ nidān paḌtī hai

ek ke muñh se jis ghaḌī niklī

phir to sau kī zabān paḌtī hai

lekin itnā koī kahe mujh se

kabhū us ke bhī kaan paḌtī hai

be-sabātī zamāne kī nā-chār

karnī mujh ko bayān paḌtī hai

garm-joshī-e-dostāñ ba-nazar

ātish-e-kārvān paḌtī hai

dil se pūchhā ye maiñ ki ishq kī raah

kis taraf mehrbān paḌtī hai

kahā un ne ki ne ba-hindustāñ

ne sū-e-asfhān paḌtī hai

ye do-rāhā jo kufr o diiñ kā hai

donoñ ke darmiyān paḌtī hai

manzilat sher kī tire 'saudā'

yuuñ ba-vahm-o-gumāñ paḌtī hai

nahīñ 'īsā' tū par suḳhan se tire

tan-e-be-jāñ meñ jaan paḌtī hai

jab nazar us ki aan paDti hai

zindagi tab dhiyan paDti hai

jhel lete hain aashiq ai farhad

jis ke sar jaisi aan paDti hai

hai jafa se gharaz use itni

ki wafa imtihan paDti hai

nazar un mah-wishan ki hai zalim

kya ghazab aan-ban paDti hai

qadd-e-zahid nazar mein chille baad

utri si kuchh kaman paDti hai

baat is dil ke dard ki yaro

guftugu mein nidan paDti hai

ek ke munh se jis ghaDi nikli

phir to sau ki zaban paDti hai

lekin itna koi kahe mujh se

kabhu us ke bhi kan paDti hai

be-sabaati zamane ki na-chaar

karni mujh ko bayan paDti hai

garm-joshi-e-dostan ba-nazar

aatish-e-karwan paDti hai

dil se puchha ye main ki ishq ki rah

kis taraf mehrban paDti hai

kaha un ne ki ne ba-hindustan

ne su-e-asfhan paDti hai

ye do-raha jo kufr o din ka hai

donon ke darmiyan paDti hai

manzilat sher ki tere 'sauda'

yun ba-wahm-o-guman paDti hai

nahin 'isa' tu par suKHan se tere

tan-e-be-jaan mein jaan paDti hai