aisa bhi inqilab kisi roz kash ho

aisā bhī inqilāb kisī roz kaash ho

ġhurbat-zadoñ ko daulat-o-zar kī talāsh ho

hai fikr ki ab aisī jagah būd-o-bāsh ho

un ko milūñ na maiñ mirī ghar ghar talāsh ho

jo mere dil meñ hai vo tire dil meñ kaash ho

ban jaa.e baat aur kisī par na faash ho

bīmār-e-ġham ko dekh ke muñh ban gayā hai kyuuñ

kyā chāhte ho tum ki vo sāhab-farāsh ho

vā'iz suneñge ham tirī bātoñ ko ġhaur se

lahja agar tirā na samā'at-ḳharāsh ho

utre asar du'ā meñ zarā ehtiyāt se

gir kar zamīn par na kahīñ paash paash ho

ham aa.e haiñ 'adam se hī lekin nahīñ qubūl

dobāra phir hamārī vahāñ būd-o-bāsh ho

gūñge butoñ ke sāmne gūñgā vo ḳhud bhī hai

aazar ho yā ki aur koī but-tarāsh ho

jo haiñ bure vo kuchh bhī nahīñ us ke sāmne

parde meñ rakh-rakhāv ke jo bad-qimāsh ho

ḳhatra hai is se baḌhtī huī 'umr ke liye

halkā bhī haath paañv meñ gar irti'āsh ho

bachnā zamīñ kī bhuuk se mumkin nahīñ 'adīl'

tābūt-e-āhanī meñ bhī gar koī laash ho

aisa bhi inqilab kisi roz kash ho

ghurbat-zadon ko daulat-o-zar ki talash ho

hai fikr ki ab aisi jagah bud-o-bash ho

un ko milun na main meri ghar ghar talash ho

jo mere dil mein hai wo tere dil mein kash ho

ban jae baat aur kisi par na fash ho

bimar-e-gham ko dekh ke munh ban gaya hai kyun

kya chahte ho tum ki wo sahab-farash ho

wa'iz sunenge hum teri baaton ko ghaur se

lahja agar tera na sama'at-KHarash ho

utre asar du'a mein zara ehtiyat se

gir kar zamin par na kahin pash pash ho

hum aae hain 'adam se hi lekin nahin qubul

dobara phir hamari wahan bud-o-bash ho

gunge buton ke samne gunga wo KHud bhi hai

aazar ho ya ki aur koi but-tarash ho

jo hain bure wo kuchh bhi nahin us ke samne

parde mein rakh-rakhaw ke jo bad-qimash ho

KHatra hai is se baDhti hui 'umr ke liye

halka bhi hath panw mein gar irti'ash ho

bachna zamin ki bhuk se mumkin nahin 'adil'

tabut-e-ahani mein bhi gar koi lash ho