dekh hamare mathe par ye dasht-e-talab ki dhul miyan

dekh hamāre māthe par ye dasht-e-talab kī dhuul miyāñ

ham se ajab tirā dard kā naata dekh hameñ mat bhuul miyāñ

ahl-e-vafā se baat na karnā hogā tirā usuul miyāñ

ham kyuuñ chhoḌeñ un galiyoñ ke pheroñ kā ma.amūl miyāñ

yūñhī to nahīñ dasht meñ pahuñche yūñhī to nahīñ jog liyā

bastī bastī kāñTe dekhe jañgal jañgal phuul miyāñ

ye to kaho kabhī ishq kiyā hai jag meñ hue ho rusvā bhii?

is ke sivā ham kuchh bhī na pūchheñ baaqī baat fuzūl miyāñ

nasb kareñ mehrāb-e-tamannā diida o dil ko farsh kareñ

sunte haiñ vo kū-e-vafā meñ aaj kareñge nuzūl miyāñ

sun to liyā kisī naar kī ḳhātir kaaTā koh nikālī nahr

ek zarā se qisse ko ab dete kyuuñ ho tuul miyāñ

khelne deñ unheñ ishq kī baazī kheleñge to sīkheñge

'qais' kī yā 'farhād' kī ḳhātir kholeñ kyā schōl miyāñ

ab to hameñ manzūr hai ye bhī shahr se niklīñ rusvā huuñ

tujh ko dekhā bāteñ kar liiñ mehnat huī vasūl miyāñ

'inshā' jī kyā uzr hai tum ko naqd-e-dil-o-jāñ nazr karo

rūp-nagar ke naake par ye lagtā hai mahsūl miyāñ

dekh hamare mathe par ye dasht-e-talab ki dhul miyan

hum se ajab tera dard ka nata dekh hamein mat bhul miyan

ahl-e-wafa se baat na karna hoga tera usul miyan

hum kyun chhoDen un galiyon ke pheron ka mamul miyan

yunhi to nahin dasht mein pahunche yunhi to nahin jog liya

basti basti kanTe dekhe jangal jangal phul miyan

ye to kaho kabhi ishq kiya hai jag mein hue ho ruswa bhi?

is ke siwa hum kuchh bhi na puchhen baqi baat fuzul miyan

nasb karen mehrab-e-tamanna dida o dil ko farsh karen

sunte hain wo ku-e-wafa mein aaj karenge nuzul miyan

sun to liya kisi nar ki KHatir kaTa koh nikali nahr

ek zara se qisse ko ab dete kyun ho tul miyan

khelne den unhen ishq ki bazi khelenge to sikhenge

'qais' ki ya 'farhad' ki KHatir kholen kya school miyan

ab to hamein manzur hai ye bhi shahr se niklin ruswa hun

tujh ko dekha baaten kar lin mehnat hui wasul miyan

'insha' ji kya uzr hai tum ko naqd-e-dil-o-jaan nazr karo

rup-nagar ke nake par ye lagta hai mahsul miyan