chale chalo jahan le jae walwala dil ka

chale chalo jahāñ le jaa.e valvala dil kā

dalīl-e-rāh-e-mohabbat hai faisla dil kā

havā-e-kūcha-e-qātil se bas nahīñ chaltā

kashāñ-kashāñ liye jaatā hai valvala dil kā

gila kise hai ki qātil ne nīm-jāñ chhoḌā

taḌap taḌap ke nikālūñgā hausla dil kā

ḳhudā bachā.e ki nāzuk hai un meñ ek se ek

tunak-mizājoñ se Thahrā mo.āmla dil kā

dikhā rahā hai ye donoñ jahāñ kī kaifiyat

karegā sāġhar-e-jam kyā muqābla dil kā

havā se vādi-e-vahshat meñ bāteñ karte ho

bhalā yahāñ koī suntā bhī hai gila dil kā

qayāmat aa.ī khulā rāz-e-ishq kā daftar

baḌā ġhazab huā phūTā hai aabla dil kā

kisī ke ho raho achchhī nahīñ ye āzādī

kisī kī zulf se lāzim hai silsila dil kā

pyāla ḳhālī uThā kar lagā liyā muñh se

ki 'yās' kuchh to nikal jaa.e hausla dil kā

chale chalo jahan le jae walwala dil ka

dalil-e-rah-e-mohabbat hai faisla dil ka

hawa-e-kucha-e-qatil se bas nahin chalta

kashan-kashan liye jata hai walwala dil ka

gila kise hai ki qatil ne nim-jaan chhoDa

taDap taDap ke nikalunga hausla dil ka

KHuda bachae ki nazuk hai un mein ek se ek

tunak-mizajon se Thahra moamla dil ka

dikha raha hai ye donon jahan ki kaifiyat

karega saghar-e-jam kya muqabla dil ka

hawa se wadi-e-wahshat mein baaten karte ho

bhala yahan koi sunta bhi hai gila dil ka

qayamat aai khula raaz-e-ishq ka daftar

baDa ghazab hua phuTa hai aabla dil ka

kisi ke ho raho achchhi nahin ye aazadi

kisi ki zulf se lazim hai silsila dil ka

pyala KHali uTha kar laga liya munh se

ki 'yas' kuchh to nikal jae hausla dil ka