phir mere shahr se guzra hai wo baadal ki tarah

phir mire shahr se guzrā hai vo bādal kī tarah

dast-e-gul phailā huā hai mire āñchal kī tarah

keh rahā hai kisī mausam kī kahānī ab tak

jism barsāt meñ bhīge hue jangal kī tarah

paas jab tak vo rahe dard thamā rahtā hai

phailtā jaatā hai phir aañkh ke kājal kī tarah

ūñchī āvāz meñ to us ne kabhī baat na kī

ḳhafgiyoñ meñ bhī vo lahja rahā komal kī tarah

roz us jism ke āseb-zada mandir meñ

dil sar-e-shām sulag uThtā hai sandal kī tarah

mil ke us shaḳhs se maiñ laakh ḳhamoshī se chalūñ

bol uThtī hai nazar paaoñ kī chhāgal kī tarah

phir mere shahr se guzra hai wo baadal ki tarah

dast-e-gul phaila hua hai mere aanchal ki tarah

keh raha hai kisi mausam ki kahani ab tak

jism barsat mein bhige hue jangal ki tarah

pas jab tak wo rahe dard thama rahta hai

phailta jata hai phir aankh ke kajal ki tarah

unchi aawaz mein to us ne kabhi baat na ki

KHafgiyon mein bhi wo lahja raha komal ki tarah

roz us jism ke aaseb-zada mandir mein

dil sar-e-sham sulag uThta hai sandal ki tarah

mil ke us shaKHs se main lakh KHamoshi se chalun

bol uThti hai nazar paon ki chhagal ki tarah